រថក្រោះអ៊ីស្រាអែល នៅថ្ងៃសុក្រ (ទី១៩ ខែមករា) បានបង្កើនការរុលទៅមុខជាថ្មីចូលទៅក្នុងទីក្រុងដ៏សំខាន់របស់តំបន់ហ្កាហ្សាភាគខាងត្បូង ជាកន្លែងដែលកំពុងផ្តល់ជម្រកដល់ប្រជាជនប៉ាឡេស្ទីនរាប់សែននាក់ ដែលត្រូវបានបង្ខំឲ្យធ្វើដំណើរទៅទីនោះដោយសារការទម្លាក់គ្រាប់បែករបស់អ៊ីស្រាអែល ដែលជាថ្មីម្តងទៀត បានទៅតែកៀកមន្ទីរពេទ្យដ៏ធំបំផុតរបស់ដែនដីនេះ ដែលនៅតែដំណើរការ។

ប្រជាជននៅក្នុងមន្ទីរពេទ្យ Nasser របស់ទីក្រុង Khan Younis ដែលត្រូវបង្ខំប្រែក្លាយទៅជាទីជម្រកសម្រាប់អ្នកស្រុកតំបន់ហ្កាហ្សា ក៏ដូចជាសម្រាប់ជំងឺ បានរាយការណ៍ថា ពួគគេបានឮការបាញ់ផ្លោងចេញពីរថក្រោះ ដែលកំពុងរុលឆ្ពោះទៅភាគខាងលិចនៃទីក្រុងនេះ ខណៈដែលអ្នកស្រុកក៏បានរាយការណ៍ពីការប្រយុទ្ធគ្នាដោយកាំភ្លើងយ៉ាងខ្លាំងក្លាទៅកាន់ភាគខាងត្បូងផងដែរ។

ក្រសួងសុខាភិបាលតំបន់ហ្កាហ្សាបានប្រាប់ឲ្យដឹងថា ប្រជាជនប៉ាឡេស្ទីន ១៤២នាក់ ត្រូវបានសម្លាប់ និង២៧៨នាក់រងរបួស ក្នុងរយៈពេល២៤ម៉ោងមុននេះ។ មន្ត្រីអ៊ីស្រាអែលបានចោទប្រកាន់ក្រុមយុទ្ធជនហាម៉ាសថា បានធ្វើប្រតិបត្តិការពីមន្ទីរពេទ្យ Nasser ដែលបុគ្គលិករបស់មន្ទីរពេទ្យបដិសេធ។

សូមរំលឹកថា ដើម្បីជាការឆ្លើយតបទៅនឹងការវាយប្រហារកាលពីថ្ងៃទី៧ ខែតុលា របស់ក្រុមហាម៉ាស ទៅលើទីក្រុង និងភូមិនានា ជុំវិញតំបន់ហ្កាហ្សា ការទម្លាក់គ្រាប់បែក និងការវាយលុកផ្លូវគោករបស់អ៊ីស្រាអែល បានចាប់ផ្តើមឡើង ដោយបានបំផ្លាញភាគច្រើននៃតំបន់ភាគខាងជើងចំនួន ២ភាគ៣ នៃតំបន់ឆ្នេរសមុទ្រ ដែលប្រវែង ៤៦គីឡូម៉ែត្រ។

ហើយបើយោងតាមអង្គការសហប្រជាជាតិ បានឲ្យដឹងថា ប្រហែល ៨៦ភាគរយនៃចំនួនប្រជាជន ២,៣ លាននាក់ ត្រូវបានបង្ខំឲ្យស្វែងរកទីជម្រកនៅភាគខាងត្បូង ជាតំបន់ដែលឥឡូវនេះ ក្លាយជាចំណុចផ្តោតនៃយុទ្ធនាការរបស់អ៊ីស្រាអែល ក្នុងការកម្ចាត់ចលនាហាម៉ាសដែលគ្រប់គ្រងតំបន់ហ្កាហ្សា៕