ភ្នំពេញ៖ រយៈពេលមួយឆ្នាំមកនេះ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះកំឡុងពេលប្រយុទ្ធប្រឆាំងកូវីដ-១៩ សម្រេចបានលទ្ធផលល្អប្រសើរ ដោយផ្ដល់ជាអត្ថប្រយោជន៍ជួយសម្រួលជីវភាពគ្រួសារក្រីក្រប្រមាណ ៧០ម៉ឺនគ្រួសារ។ នេះជាការលើកឡើងរបស់មន្ត្រីជំនាញ នៃក្រសួងសង្គមកិច្ច ជាក្រសួងសាម៉ីក្នុងការអនុវត្តកម្មវិធីជំនួយសង្គមមួយនេះ។
ជុំវិញការអនុវត្តកម្មវិធី ឧបត្ថម្ភសាច់ប្រាក់ជូនគ្រួសារក្រីក្រកំឡុងកូវីដ-១៩ ក្នុងរយៈពេលមួយឆ្នាំមកនេះ គឺអនុវត្តសម្រេចបានលទ្ធផលល្អប្រសើរ។ នេះជាការលើកឡើងរបស់ លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច។
លោកបានបញ្ជាក់ថា កម្មវិធីជំនួយសង្គមមួយនេះ រាជរដ្ឋាភិបាលបានចំណាយថវិកាសរុបប្រមាណជាង ៣៥១លានដុល្លារ ដោយថវិកាទាំងនេះ បានជួយសម្រួលជីវភាពនៅរបស់គ្រួសារក្រីក្រប្រមាណ ៧០ម៉ឺនគ្រួសារទូទាំងប្រទេស គិតជាចំនួនប្រជាពលរដ្ឋប្រមាណជាង ២លាន ៧សែននាក់។
សម្រាប់ថ្ងៃទី២៧ មិថុនានេះ ក៏ជាថ្ងៃអនុវត្តការបើកសាច់ប្រាក់សម្រាប់គ្រួសារទទួលផល សម្រាប់ខែ មិថុនាផងដែរ ដោយចាប់ផ្ដើមពីថ្ងៃទី២៥ មិថុនា រហូតដល់ថ្ងៃទី២៤ ខែកក្កដា ឆ្នាំ២០២១ខាងមុខ។ លោកលើកដែរថា ត្រឹមរយៈពេលមួយព្រឹកនេះ ក៏មានគ្រួសារក្រីក្រចំនួន ជាង១០ម៉ឺនគ្រួសារបានទៅបើកសាច់ប្រាក់រួចរាល់ផងដែរ។
ចំពោះការបន្ត រឺមិនបន្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះកំឡុងពេលប្រយុទ្ធប្រឆាំងកូវីដ-១៩នេះ គឺមិនទាន់មានការបញ្ជាក់នោះទេ។ លោក ឈួរ សុបញ្ញា បញ្ជាក់ថាការបន្តរឺមិនបន្តគឺអាស្រ័យលើ ការវាយតម្លៃរបស់ក្រុមប្រឹក្សាជាតិគាំពារសង្គម។
លោកបន្តថា ការបន្តរឺមិនបន្តក៏អាស្រ័យលើស្ថានភាពជាក់ស្ដែងនៃ ការរាតត្បាតជំងឺកូវីដ-១៩ផងដែរ។ លោកថា ការបន្តរឺមិនបន្ត នឹងមានប្រកាសជាផ្លូវការ ក្នុងកំឡុងប្រមាណមួយខែខាងមុខនេះ។
សម្រាប់កម្មវិធីជំនួយសង្គមនេះ គឺសម្រាប់តែគ្រួសារក្រីក្រដែលមានបណ្ណសមធម៌មាន សុពលភាពតែប៉ុណ្ណោះ ចំពោះគ្រួសារដែលពុំមានបណ្ណសមធម៌ រឺមានបណ្ណហួស សុពលភាពគឺពុំអាចទទួលបានជំនួយថវិកាពីរាជរដ្ឋាភិបាលនេះនោះទេ៕ អត្ថបទ៖ គឹម ហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
