ប្រធានវេទិកាសេដ្ឋកិច្ចពិភពលោក (WEF) លោក Borge Brende បានលើកឡើងពីសារៈសំខាន់នៃកិច្ចសហប្រតិបត្តិការពិភពលោក ក្នុងសុន្ទរកថាបិទរបស់លោក នៅថ្ងៃសុក្រ (ទី១៩ ខែមករា) នេះ។

អំឡុងសន្និសីទបិទកិច្ចប្រជុំប្រចាំឆ្នាំ ដែលមានប្រធានបទ «ការកសាងទំនុកចិត្តឡើងវិញ» នៅឆ្នាំនេះ លោក Brende បានប្រាប់ថា៖ «វាលែងមានរឿងបែបនេះទៀតហើយដែលប្រទេស ក្រុមហ៊ុន ឬសហគមន៍ត្រូវបានទុកចោលដោយឡែកពីការរង្គោះរង្គើជាសកលនោះ។ ហើយនៅពេលវាជួបនឹងស្ថានភាពនោះ វាជារឿងមិនអាចទៅរួចនោះឡើយ ដែលត្រូវដោះស្រាយម្នាក់ឯង»។

ក្នុងរយៈពេល ៥ថ្ងៃនៃកិច្ចប្រជុំ និងកិច្ចប្រជុំគណៈកម្មាការ សង្រ្គាមនៅអ៊ុយក្រែន និងអ៊ីស្រាអែល វិបត្តិអាកាសធាតុ និងបញ្ញាសិប្បនិម្មិត (AI) បានក្លាយជារបៀបវារៈនៃសន្និសីទលើកទី៥៤ នេះ។

ឥស្សរជននយោបាយជាន់ខ្ពស់ជាច្រើនរូប ដែលរួមមានប្រធានាធិបតីអ៊ុយក្រែន លោក Volodymyr Zelenskiy រដ្ឋមន្ត្រីការបរទេសសហរដ្ឋអាមេរិក លោក Antony Blinken នាយករដ្ឋមន្ត្រីចិន លោក Li Qiang និងប្រធានាធិបតីអ៊ីស្រាអែល លោក Isaac Herzog បានបង្ហាញខ្លួនពេញមួយសប្តាហ៍។

ទិដ្ឋភាពវិបត្តិសេដ្ឋកិច្ចពិភពលោក ជាមួយនឹងការផ្លាស់ប្តូរគោលនយោបាយអត្រាការប្រាក់ និងការកើនឡើងនូវបំណុល ក៏បានកា្លយជាបញ្ហាប្រឈមផងដែរ សម្រាប់ធនាគារកណ្តាល អ្នកហិរញ្ញវត្ថុ និងអ្នកដឹកនាំអាជីវកម្មដែលបានចូលរួម៕