ក្រុមហ៊ួទីរបស់យេម៉ែនបាននិយាយថា ពួកគេមិនមានបំណងពង្រីកការវាយប្រហាររបស់ខ្លួនលើការដឹកជញ្ជូនទំនិញ ទាំងនៅក្នុង និងជុំវិញសមុទ្រក្រហមនោះទេ ដោយវាហួសពីគោលបំណងដែលពួកគេបានបញ្ជាក់ ក្នុងការរារាំងអ៊ីស្រាអែល និងក្នុងការសងសឹកប្រឆាំងនឹងសហរដ្ឋអាមេរិក និងចក្រភពអង់គ្លេសចំពោះការវាយប្រហារតាមអាកាស។

ក្នុងបទសម្ភាសន៍ជាមួយសារព័ត៌មាន Reuters អ្នកនាំពាក្យលោក Mohammed Abdulsalam ដែលជាប្រធានអ្នកចរចារបស់ក្រុមហ៊ួទី ក្នុងកិច្ចចរចាសន្តិភាព ជុំវិញសង្គ្រាមស៊ីវិល ដែលមានរយៈពេលមួយទសវត្សរ៍របស់ប្រទេសនេះនោះ បានប្រាប់ថា ក្រុមនេះមិនមានផែនការដើម្បីកំណត់គោលដៅចំពោះសត្រូវយូរអង្វែង គឺអារ៉ាប៊ីសាអ៊ូឌីត និងអារ៉ាប់រួមនោះឡើយ។

លោក Abdulsalam បាននិយាយថា៖ «យើងមិនចង់ឲ្យមានការពង្រីកជម្លោះនោះទេ។ នេះមិនមែនជាការទាមទាររបស់យើងឡើយ។ យើងបានចេញច្បាប់នៃការចូលរួម ដែលមិនមានការបង្ហូរឈាមមួយតំណក់ ឬការបាត់បង់សម្ភារៈសំខាន់ៗនោះឡើយ។ សកម្មភាពរបស់យើងតំណាងឲ្យការដាក់សម្ពាធលើអ៊ីស្រាអែលតែប៉ុណ្ណោះ វាមិនតំណាងឲ្យការដាក់សម្ពាធលើប្រទេសណាមួយ ក្នុងពិភពលោកនោះឡើយ»។

សូមបញ្ជាក់ថា ក្រុមហ៊ួទីដែលមានសម្ព័ន្ធមិត្តជាមួយអ៊ីរ៉ង់ និងដែលគ្រប់គ្រងភាគច្រើននៃតំបន់ដែលមានប្រជាជនច្រើនរបស់បរ្ទេសយេម៉ែន បានវាយប្រហារលើនាវានានា នៅផ្លូវចេញចូលសមុទ្រក្រហម ចាប់តាំងពីខែតុលា ជាអ្វីដែលពួកគេនិយាយថា គឺជាការបង្ហាញពីសាមគ្គីភាពជាមួយប៉ាឡេស្ទីន ដោយកំណត់គោលដៅលើនាវាដែលភ្ជាប់ទំនាក់ទំនងជាមួយអ៊ីស្រាអែល៕