ក្នុងឱកាសទើបទទួលបានតំណែងជាប្រធានអគ្គសម្ព័ន្ធសហភាពសហជីពកម្ពុជា អាណិត្តទី៨ លោក តុល ផាន់មឿង បានប្តេជ្ញាថា នឹងដឹកនាំក្រុមការងារទាំងមូល ដើម្បី​លុប​បំបាត់​នូវ​រាល់​អសកម្ម​ភាព ដែលក្រុមហ៊ុនណាមិនអនុវត្តទៅតាមច្បាប់ស្តីពីការងារ និងការងា​រ​មួយ​ចំនួន​ទៀត​ដែល​មិន​បាន​អនុវត្តនៅក្នុងក្រុមហ៊ុន។

លោក តុល ផាន់មឿង បានអះអាងយ៉ាងដូច្នេះ បន្ទាប់​ពី​លោក​បាន​ប្រឡូក​ក្នុង​វិស័យ​សហជីព​អស់​រយៈពេល​ជាច្រើនឆ្នាំមកហើយនៅកម្ពុជា ដែលតែងតែចូលជ្រៅទៅដល់រោងចក្រ សហគ្រាស ក្រុមហ៊ុន ក៏ដូចជាបង្កើតចលនាកម្មករនិយោជិត និងការងារកសាងបក្សនៅតាមរោងចក្រ សហ​គ្រាស​ គ្រឹះស្ថានជាដើម។

លោកបានឲ្យទូរទស្សន៍ព័ត៌មាន ប៊ីធីវី ដឹងទៀតថា គិតមកដល់បច្ចុប្បន្ននេះ អគ្គ​សម្ព័ន្ធ​សហភាព​សហជីព​កម្ពុជា​បានដំណើរការជាង ១០ឆ្នាំមកហើយ ដោយគ្របដណ្តប់លើវិស័យវាយនភ័ណ្ឌ កាត់ដេរស្បែកជើង និងផលិតផលិតផលធ្វើដំណើរនិងកាបូប និងវិស័យសំណង់។ លោក​បាន​ប្តេជ្ញា​ថា នឹងខិតខំយ៉ាងណា អនុវត្តឲ្យបានត្រឹមត្រូវតាមគោលនយោបាយរបស់រាជរដ្ឋាភិបាល ដែល​ជួយ​ដល់កម្មករ កម្មការិនី បុគ្គលិកក្នុងការងារ និងជីវភាពរស់នៅ ព្រមទាំង​ចូលរួម​ទំនាក់​ទំនង​ជាមួយ​ក្រសួងការងារ និងបណ្តុះបណ្តាល​វិជ្ជាជីវៈ ​ដើម្បី​ជួយ​សម្រួល​ដល់​សហជីព​នានា​ឲ្យ​ចេះ​សាមគ្គីគ្នា។ លោកសន្យាទៀតថា ក៏នឹងចូលរួមជួយសម្របសម្រួល និងស្វែង​រក​ដំណោះ​ស្រាយ​វិវាទដែល​កើតមានឡើងនៅក្នុងរោងចក្រ សហគ្រាស គ្រឹះស្ថាននានា​របស់​សមាជិក​ផង​ដែរ​។

ឯកឧត្តម អ៊ិន ខេមរា រដ្ឋលេខាធិការនៃក្រសួងការងារ និងបណ្ដុះបណ្ដាលវិជ្ជាជីវៈ ក្នុង​ឱកាស​អញ្ជើញ​ជា​អធីបតី​ក្នុងពិធីប្រកាសចូលកាន់ដំណែងប្រធានអគ្គសម្ព័ន្ធសហភាពសហជីពកម្ពុជា (CGCU) ឆ្នាំ២០២៤-២០២៥ អាណត្តិទី៨ កាលពីល្ងាចថ្ងៃទី១៩ ខែមករា ឆ្នាំ២០២៤នេះ បាន​មាន​ប្រសាសន៍ថា កន្លងមក CGCU បានចូលរួម​ចំណែក​ក្នុង​ការ​អភិវឌ្ឍ​ប្រទេស​ដោយ​បាន​ពង្រឹង​ស្មារតី​សាមគ្គី​ភាពជាធ្លុងមួយ ដើម្បីជាផលប្រយោជន៍ប្រទេសជាតិ និងផល​ប្រយោជន៍​រួមក្នុង​ស្ថាប័ន​ខ្លួន​ផ្ទាល់ ទៅតាមគោលនយោបាយរបស់រាជរដ្ឋាភិបាល។ ជាមួយគ្នានោះដែរ ឯកឧត្តម ក៏​បាន​ផ្តល់​អនុសាសន៍ទៅដល់ CGCU ត្រូវពង្រឹង​កម្លាំង​កម្មករ​និយោជិត​ដែល​ជា​សមាជិក​របស់​សហជីព​ដែល​មានស្រាប់ ឲ្យយល់អំពីច្បាប់ស្ដីពីការងារ និងច្បាប់ស្ដីពីសហជីព ឲ្យបាន​ទូលំ​ទូលាយ​ ជាពិសេសលក្ខខណ្ឌការងារនៃច្បាប់ថ្មីៗដែលក្រសួងការងារ បានផ្សព្វផ្សាយរួចហើយ និង​ត្រូវ​រួប​រួម​សាមគ្គីភាពផ្ទៃក្នុងអោយបានល្អបំផុតដើម្បីការរីកចម្រើនរបស់អង្គភាព និង​បម្រើ​ផល​ប្រយោជន៍​ជូន​ប្រទេសជាតិ៕ អត្ថបទ៖ ឈិត បូរ៉ាវី