ភ្នំពេញ៖ ក្រសួងការងារ និងបណ្តុះបណ្តាល វិជ្ជាជីវៈ បានចេញ​នូវ​សេចក្តី​ណែនាំទៅ​កាន់​សហគ្រាស គ្រឹះស្ថាន ត្រូវពង្រឹងការអនុវត្តវិធានការបង្ការអគ្គិភ័យ និងវិធានការសុវត្ថិភាព និង​សុខ​ភាព​ការងារ​របស់កម្មករ និយោជិត បើធ្វេសប្រហែស បណ្តាលឱ្យប៉ះពាល់ដល់អាយុជីវិត ទ្រព្យ​សម្បត្តិ សន្តិសុខ និងសណ្ដាប់ធ្នាប់សាធារណៈ ត្រូវទទួលរងពិន័យតាមច្បាប់ស្តីពី ការងារ និង​ការ​ផ្ដន្ទាទោសព្រហ្មទណ្ឌផ្សេងទៀត ។

យោងតាមសេចក្តីណែនាំក្រសួងការងារ និងបណ្ដុះបណ្ដាល វិជ្ជាជីវៈ កាលពីថ្ងៃទី១៩ ខែមករា ឆ្នាំ២០២៤ បានឲ្យដឹងថា រយៈពេលថ្មីៗកន្លងមកនេះ សង្កេតឃើញ​មាន​ករណី​អគ្គិភ័យ​កើត​ឡើង​ជា​បន្ត​បន្ទាប់​នៅតាមសហគ្រាស គ្រឹះស្ថានមួយចំនួន បានធ្វើឱ្យបាត់បង់អាយុជីវិតមនុស្ស និង​ប៉ះពាល់​សុវត្ថិភាព និងសុខភាពការងាររបស់កម្មករនិយោជិត ដំណើរការអាជីវកម្ម សន្តិសុខ និង​សណ្ដាប់​ធ្នាប់​សាធារណៈ និងស្របពេលក្រសួងធនធានទឹក និងឧតុនិយម បានប្រកាស​ពី​ការ​ឡើង​កម្ដៅ​អាកាសធាតុដល់ ៤១°C នៅខែមេសា និងឧសភា ឆ្នាំ២០២៤ ។

សេចក្តី​ណែនាំបន្តថា ដូចនេះម្ចាស់ ឬនាយកសហគ្រាស គ្រឹះស្ថានទាំងអស់ ត្រូវចូល​រួម​ពង្រឹង​ការ​អនុវត្ត​នូវវិធានការ បង្ការអគ្គិភ័យ និងវិធានការសុវត្ថិភាព និងសុខ​ភាព​ការងារ​របស់​កម្មករ​និយោជិត សំដៅធានាបាននូវបរិយាកាស នៅកន្លែងធ្វើការប្រកបដោយសុវត្ថិភាព ទប់ស្កាត់​បាន​នូវ​គ្រោះ​អគ្គិភ័យ និងករណីដួលសន្លប់ គឺត្រូវបង្កើនការយកចិត្តទុកដាក់ខ្ពស់ និងអនុវត្តន៍​ឱ្យ​ម៉ឺងម៉ាត់​នូវ​វិធានការចាំបាច់មួយចំនួន ។

 ក្នុងនោះរួមមាន បង្កើនការត្រួតពិនិត្យជាប្រចាំ នូវបណ្តាញផ្គត់ផ្គង់ចរន្តអគ្គិសនី ធ្វើ​ការ​វាស់​កម្តៅ​ឧបករណ៍​ផ្ដល់​ចរន្តអគ្គិសនី, ត្រួតពិនិត្យ និងជំរុញការអនុវត្តតួនាទី និងភារកិច្ចរបស់គណៈកម្មការ ឬក្រុមការងារសុវត្ថិភាព និងសុខភាព, អប់រំ និងបណ្តុះ​បណ្តាល​កម្មករ​និយោជិត​ឱ្យ​យល់​ដឹង​អំពី​សញ្ញា​សុវត្ថិភាព របៀបជម្លៀសខ្លួន និងធ្វើលំហាត់សមឱ្យបានទៀងទាត់, ត្រួតពិនិត្យ​ជា​ប្រចាំ​នូវ​មធ្យោបាយ​សង្គ្រោះបឋម និងដំណើរការគិលានដ្ឋានប្រចាំសហគ្រាស, ត្រួតពិនិត្យ និងធ្វើ​តេស្ត​សាក​ល្បង​ប្រព័ន្ធ និងឧបករណ៍ការពារអគ្គិភ័យជាប្រចាំ, ត្រួតពិនិត្យជាប្រចាំនូវច្រកអាសន្ន ដែល​អាច​ជម្លៀស​ខ្លួនចេញដោយសុវត្ថិភាព គ្មានឧបសគ្គ និងមានភ្លើងបំភ្លឺដោយស្វ័យប្រវត្តិ ​នៅ​ពេល​ដាច់​ចរន្តអគ្គិសនី និងរៀបចំឱ្យមានផែនការឆ្លើយតបនៅគ្រាអាសន្ន ។

ប្រភពបន្ថែមថា ត្រូវត្រួតពិនិត្យ និងថែទាំជាប្រចាំប្រព័ន្ធបញ្ចេញបញ្ចូលខ្យល់ នៅតាមអគារធ្វើការ, បើក​បង្អួច ទ្វារទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញ ក្នុងអគារផលិតកម្ម, ណែនាំ​ដល់​កម្មករ​និយោជិតបរិភោគទឹកស្អាត និងមានអនាម័យ, ត្រួតពិនិត្យ និងចាត់វិធានការចាំបាច់ ដើម្បី​ឆ្លើយតបទៅនឹងការសាយភាយ នៃសារធាតុគ្រោះថ្នាក់ និងចំពោះសហគ្រាស គ្រឹះស្ថាន ដែល​ប្រើ​ប្រាស់ឡចំហាយ ត្រូតពិនិត្យជាប្រចាំនូវការប្រើប្រាស់ ។

ក្នុងករណី​ចាំបាច់ អាចធ្វើការទំនាក់ទំនងតាមរយៈប្រព័ន្ធHotline លេខ“១២៩៧” ឬក្រុម​តេឡេក្រាម “សម្រាប់និយោជក” (https://t.me/EmployerChat) ឬក្រុមតេឡេក្រាម “សម្រាប់​កម្មករ​និយោជិត” (https://t.me/ KhmerWorkerChat) ឬអាជ្ញាធរពាក់ព័ន្ធ ដើម្បី​ចុះ​ធ្វើ​ការ​វាយ​តម្លៃ​កម្រិត​ហានិភ័យ ដែលអាចកើតមានឡើងចំពោះសុវត្ថិភាពកម្មករនិយោជិត ក្នុងអំឡុង​ពេល​សីតុណ្ហភាព​ឡើងកម្ដៅខ្លាំង៕ អត្ថបទ៖ បាន សុខរិទ្ធិ