អធិការបតីអាល្លឺម៉ង់ លោក Olaf Scholz បានចាត់ទុកការតវ៉ាប្រឆាំងក្រុមស្តាំនិយមជ្រុល ដែល​មាន​ផែន​ការ​ធ្វើ​នៅទូទាំងប្រទេសនៅចុងសប្តាហ៍នេះថា «ល្អប្រសើរ និងត្រឹមត្រូវ» នៅក្នុង​សារ​វីដេអូ​មួយ កាលពីថ្ងៃសុក្រ ដោយបានស្វាគមន៍ចំពោះច្បាប់ថ្មី ដែលកាត់​បន្ថយ​មធ្យោបាយ​ទៅ​រក​ការ​ចូល​សញ្ជាតិ និងបន្ធូរបន្ថយច្បាប់និរទេស។

ការតវ៉ាថ្មី ត្រូវបានគេគ្រោងទុកបន្ទាប់ពីរបាយការណ៍មួយក្នុងខែនេះ អំពីការ​ជួប​ជុំ​របស់​មន្ត្រី​ស្តាំ​និយម នៅក្នុងទីក្រុងប៊ែរឡាំង ដែលមានគោលគំនិតស្តីពី «ការធ្វើអន្តោប្រវេសន៍ជាថ្មី» ត្រូវ​បាន​ពិភាក្សា​។

លោក Scholz បាននិយាយថា «លោកព្យាយាមស្រមៃមើលថាតើប្រជាពលរដ្ឋជាង ២០ លាន​នាក់ ដែលមានប្រវត្តិនៃការធ្វើអន្តោប្រវេសន៍មានអារម្មណ៍យ៉ាងណា» អំពី​ផែនការ​ដែល​បាន​រាយ​ការណ៍​នោះ ដោយបានចាត់ទុកភាពស្តាំនិយមជ្រុល គឺជាការវាយប្រហារលើលទ្ធិប្រជាធិបតេយ្យ។

ភ្លាម​ៗ​បន្ទាប់ពីការចេញផ្សាយសុន្ទរកថារបស់លោក អ្នករៀបចំការតវ៉ានៅទីក្រុង Hamburg បាន​និយាយ​ថា មនុស្ស ៣៥.០០០នាក់ បានចេញធ្វើបាតុកម្មប្រឆាំងជម្រើសស្តាំនិយមជ្រុល សម្រាប់​ប្រទេស​អាល្លឺម៉ង់។ ជម្រើសស្តាំនិយមជ្រុល កំពុងស្ថិតនៅក្រោមការស៊ើបអង្កេត ដោយអាជ្ញាធរ​សន្តិសុខ​នៅ​ក្នុង​រដ្ឋមួយចំនួនរបស់ប្រទេសអាល្លឺម៉ង់ ហើយមាន​ហានិភ័យ នៃ​ការ​ត្រូវ​បាន​ប្រកាស​ថា​ជា​អង្គការ​ជ្រុលនិយមដោយអាជ្ញាធរជាតិ ជាចំណាត់ការមួយ អាចនាំទៅរកការហាមឃាត់៕