មណ្ឌលគិរី៖ ស្ត្រីជនជាតិព្នងប្រមាណជិត២០នាក់ រស់នៅភូមិពូរាំង ឃុំសែនមនោរម្យ ស្រុកអូររាំង ខេត្តមណ្ឌលគិរី បាននិងកំពុងហាត់រៀនវិជ្ជាត្បាញក្រមាដោយប្រើអំបៅឆៅ និងប្ដូរវិធីត្បាញតាមបែបបូរាណ មកបែបសម័យដូចខ្មែរកណ្ដាល ព្រោះធ្វើបែបនេះចំណេញពេលវេលា ត្បាញបានលឿន និងបានច្រើនក្រមាពេលត្បាញម្ដងៗ ។
ការផ្លាស់ប្ដូររបៀបត្បាញក្រមាបែបបូរាណជនជាតិព្នង មកបែបទំនើបដូចខ្មែរកណ្ដាល គឺបងប្អូនជនជាតិព្នងក្នុងសហគមន៍ពូរាំងដោយខ្លួនបានសំណូមសុំគ្រូបង្គោលម្នាក់មកបង្រៀនពួកគាត់ តាមរយៈអង្គការដៃគូក្នុងតំបន់ ព្រោះតែពួកគាត់ចង់ចេះ ចង់យល់ដឹង អំពីវិធីត្បាញក្រមាបានស្អាត និងលឿនកាត់បន្ថយការលំបាក ។ ឆ្លើយតបនិងតម្រូវការចំណេះមួយនេះ ក្នុងនោះអង្គការ IIRR បានផ្ដល់គ្រូបង្គោល ចំណែកអង្គការរេដបូកបានផ្ដល់ជំនួញជាសម្ភារៈតម្បាញសម្រាប់រៀនតម្បាញ។
អ្នកស្រី អ៊ូ ផារី ជាគ្រូបង្រៀនតម្បាញដល់ប្រជាសហគមន៍ពូរាំង បានឲ្យដឹងថា តាមរយៈការស្នើសុំរបស់សហគមន៍ពូរាំង និងសហគមន៍ពូតាំង អ្នកស្រីបានមកបង្រៀនដល់ស្ត្រីជិត២០នាក់ក្នុងសហគមន៍ ពាក់ព័ន្ធការត្បាញអំបោះឆៅ ត្បាញធ្វើក្រមា។ អ្នកគ្រូ ផារី លើកឡើងទៀតថា ចំពោះការត្បាញក្រមារបស់បងប្អូនជនជាតិបែបបូរាណពី គឺមានភាពស្មុគស្មាញច្រើន ហើយការត្បាញម្តងបានតែក្រមាមួយប៉ុណ្ណោះ ប៉ុន្តែចពោះការបង្រៀនរបៀបតម្បាញបែបថ្មីនេះ បង្រៀនពួកគាត់អោយចេះត្បាញក្រមាបែបខ្មែរកណ្ដាល ដោយបង្រៀនឲ្យចេះរៀបចំធ្វើជាកីតម្បាញបានវែង តម្បាញម្តងៗផលិតក្រមាបានរហូតដល់៥០ក្រមាឯណ្ណោះ។
អ្នកស្រី អ៊ូ ផារី បន្តថា ក្រមាបែបខ្មែរកណ្ដាលក៏មានទីផ្សារល្អជាងក្រមាបែបប្រពៃណីបូរាណរបស់បងប្អូនជនជាតិភាគតិចផងដែរ ។
លោកស្រី ក្លេវ ទឺត ជាជនជាតិដើមភាគតិចពូនង(ព្នង) ដែលមានវ័យចំណាស់ទៅហើយបានលើកឡើងដែរថា លោស្រីចង់ឲ្យក្មេងជំនាន់ក្រោយងាកមកនាំគ្នារៀនរបៀបតម្បាញក្រមារបៀបថ្មីវិញ ហើយតម្បាញបែបបូរាណក៏យើងរក្សាទុក ដើម្បីថែរក្សាវប្បធម៌ ប្រពៃណី អត្តសញ្ញាណឲ្យក្មេងៗថ្ងៃអនាគតស្គាល់ និងបានឃើញ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
