រថយន្តដឹកទំនិញជាង ៥០០គ្រឿង រួមជាមួយត្រាក់ទ័ររាប់សិបគ្រឿង ត្រូវបានចតនៅជិតច្រក ទ្វារ​រដ្ឋ Brandenburg ទីក្រុងប៊ែកឡាំង កាលពីថ្ងៃសុក្រ ក្នុង​ការ​តវ៉ា​ជុំវិញការ​ដំឡើង​ពន្ធផ្លូវ​ សម្រាប់​រថយន្ត​ដឹកទំនិញ។ យោងតាមនគរបាលទីក្រុងប៊ែរឡាំងបានឲ្យដឹងថា មនុស្សរាប់រយនាក់​បាន​ចូលរួម​ការ​ប្រមូលផ្តុំគ្នា​ជាមួយ​វាគ្មិន​បញ្ចេញ​មតិរិះគន់​លើ​រដ្ឋាភិបាល​ចម្រុះ​៣​គណបក្ស​នា​ពេល​បច្ចុប្បន្ន ដែលដឹកនាំដោយអធិការបតី លោក Olaf Scholz ។ ស្ថាប័នអាល្លឺម៉ង់ Bundestag ឬ​សភា បានសម្រេចបង្កើនបញ្ជរបង់ប្រាក់ផ្លូវហាយវ៉េ សម្រាប់​រថយន្ត​ដឹកទំនិញ​ធុនធ្ងន់​កាល​ពីខែ​តុលា ឆ្នាំមុន ទាក់ទងនឹងការបំភាយឧស្ម័ន កាបូនីក។

វិធានការនេះ កើតមានឡើងខណៈមានការខិតខំដើម្បីចេញឆ្ងាយពីឥន្ធនៈហ្វូស៊ីល និង​ដើម្បី​ជួយ​ដល់​ហេដ្ឋារចនាសម្ព័ន្ធផ្លូវរថភ្លើងរបស់ប្រទេសអាល្លឺម៉ង់។

យានយន្ត ដែលដំណើរការដោយអគ្គិសនី ឬអ៊ីដ្រូសែន ត្រូវបានលើក​លែង​ពី​ថ្លៃ​សេវា​កើន​​ឡើង​នេះ​។ ក្រុមអ្នករិះគន់អះអាងថា ការកើនឡើងបញ្ជរបង់ប្រាក់នឹងត្រូវបញ្ជូនទៅអ្នកប្រើប្រាស់ ដោយ​សារ​តែ​សហគ្រិននឹងមិនអាចទទួលយកការចំណាយបន្ថែមបាន ហើយហេដ្ឋា​រចនា​សម្ព័ន្ធ​សម្រាប់​រថយន្ត​អគ្គិសនី មិនទាន់ត្រូវបានអភិវឌ្ឍគ្រប់គ្រាន់នៅឡើយ។

ការតវ៉ារបស់អ្នកបើកបររថយន្តដឹកទំនិញ បាននាំឱ្យ​មាន​ការ​បង្វែរ​ចរាចរណ៍​នៅ​ក្នុង​រដ្ឋធានី​ប្រទេស​អាល្លឺម៉ង់ ជាច្រើនថ្ងៃបន្ទាប់ពីការតវ៉ារយៈពេលមួយសប្តាហ៍ដោយកសិករ ដែល​បាន​យក​ត្រាក់​ទ័រ​របស់​ពួកគេទៅកាន់ទីក្រុងប៊ែរឡាំង និងទីក្រុងមួយចំនួនទៀត ដើម្បីតវ៉ា​ប្រឆាំង​ការ​កាត់​បន្ថយ​ការ​ឧបត្ថម្ភធនសម្រាប់ប្រេងម៉ាស៊ូតកសិកម្ម៕