ទីភ្នាក់ងារសារព័ត៌មានរដ្ឋ Xinhua របស់ប្រទេសបានរាយការណ៍ថា មនុស្ស ១៣ នាក់ស្លាប់ បន្ទាប់​ពីអគ្គីភ័យ បាន​ឆាប​ឆេះ​នៅ​ក្នុង​អគារ​អន្តេ​វាសិកដ្ឋាន​សាលា​រៀន​មួយ​កន្លែង​នៅ​ភាគ​កណ្តាល​ប្រទេសចិន។

អគ្គិភ័យដ៏ខ្លាំងនេះ បានកើតឡើងកាលពីយប់ថ្ងៃសុក្រ នៅសាលាររៀនកុមារតូច ក្នុងភូមិ Yanshanpu ខេត្ត ហេណាន(Henan) ។ យោងតាមសារព័ត៌មាន China Daily បានឱ្យដឹងថា សាលា​រៀនដំណើរការដោយផ្នែកឯកជននេះ បម្រើដល់សិស្សថ្នាក់មត្តេយ្យសិក្សា និង​សិស្ស​បឋម​សិក្សា​។

អ្នកគ្រប់គ្រងសាលារៀន នៅជិតទីក្រុង Nanyang ត្រូវបានឃុំខ្លួន ហើយ​ការ​ស៊ើប​អង្កេត​កំពុង​ដំណើរ​ការ​។ ចំណែកមនុស្សម្នាក់ទៀត កំពុងសម្រាកព្យាបាលនៅមន្ទីរពេទ្យ ហើយ​កំពុង​ស្ថិត​ក្នុង​ស្ថាន​ភាព​ស្ថិរភាព។ ពុំមានព័ត៌មានលម្អិតបន្ថែមទៀតអំពីអត្តសញ្ញាណអ្នកស្លាប់ ឬ​មូល​ហេតុ​នៃ​អគ្គិភ័យ ត្រូវបានផ្សព្វផ្សាយតាមបណ្តាញផ្លូវការឡើយ។ សារព័ត៌មាន ស៊ីនហួរបានរាយការណ៍ថា អគ្គិភ័យត្រូវបានពន្លត់រយៈពេលមិនដល់មួយម៉ោងនោះទេ បន្ទាប់​ពី​ក្រុម​ពន្លត់​អគ្គិភ័យ​ត្រូវ​បាន​ជូន​ដំណឹង​។ អគ្គីភ័យបណ្តាលឲ្យមានមនុស្លាប់ នៅក្នុងប្រទេសចិន មិនមែនជារឿងប្លែកនោះទេ ដោយ​សារតែការអនុវត្តស្ដង់ដារអគារ និងសុវត្ថិភាពមានភាពធូរលុង។ កាលពីខែវិច្ឆិកា មនុស្ស​ចំនួន ២៦ នាក់បានស្លាប់បន្ទាប់ពីមានអគ្គីភ័យឆាបឆេះអគារការិយាល័យមួយក្នុងទីក្រុង Luliang ខេត្ត Shanxi។

អគ្គិភ័យឆេះមន្ទីរពេទ្យក្នុងទីក្រុងប៉េកាំងកាលពីខែមេសា ឆ្នាំមុន ក៏បានឆក់​យក​ជីវិត​មនុស្ស​យ៉ាង​ហោច​ណាស់ ២៩ នាក់ ដែលភាគច្រើនជាអ្នកជំងឺ ហើយបានបង្ក​ឱ្យ​មាន​ការ​ស៊ើប​អង្កេត​ដែល​មនុស្ស ១២ នាក់ត្រូវបាននគរបាលឃាត់ខ្លួន៕