កម្មវិធី«សំណេរអង្គរ» លើកទី១ នឹងប្រព្រឹត្តិធ្វើឡើង នៅថ្ងៃទី២១ខែមករាស្អែក នៅ​មុខ​ប្រាសាទ​អង្គរ ខេត្តសៀមរាប ដោយមានបេក្ខជនចូលរួមប្រកួតជាង៨០០នាក់។

មានប្រសាសន៍ក្នុងកិច្ចសម្ភាសជាមួយBTV លោក លីម ប៊ុនហុក អ្នករៀបចំកម្មវិធីសំណេរអង្គ បាន​ឱ្យដឹងថា កម្មវិធី«សំណេរអង្គរ» ធ្វើឡើងក្នុងគោលបំណងលើកកម្ពស់អក្សរសាស្ត្រខ្មែរ ជា​ពិសេស​គឺ​ជំរុញឱ្យប្រជាពលរដ្ឋ កែប្រែទម្លាប់អក្ខរាវិរុទ្ធក្នុងការសរសេរ និង​អាន​ពាក្យ​ខ្មែរឱ្យ​បាន​ត្រឹមត្រូវ។

លោកបន្តថា កម្មវិធីសំណេរអង្គរ ប្រព្រឹត្តិធ្វើឡើងនៅថ្ងៃទី២១ ខែមករា នេះ មានបេក្ខជន​ចូលរួម​ប្រកួត​ចំនួន ៨១៥នាក់ មានទាំងសិស្ស លោកគ្រូ អ្នកគ្រូ ព្រះសង្ឃ និងសាធារជនទូទៅផងដែរ។ សម្រាប់​រយៈពេលនៃការប្រកួតមានពេល១ម៉ោង ប្រធានបទ គឺពាក់ព័ន្ធនឹងតំ បន់អង្គរ ដែល​ជា​ទឹក​ដី​ដ៏អច្ឆរិយៈនៃប្រជាជាតិខ្មែរ ជាអតីតរាជធានីខ្មែរសម័យចក្រភពអង្គរជាង៦០០ឆ្នាំ។ លើស​ពី​នេះ លោករំពឹងថា ប្រសិនបើកម្មវិធីសំណេរអង្គរលើកទី១ ទទួលបានជោគជ័យ នោះក្រុមការងារ នឹង​ធ្វើឡើងមួយឆ្នាំម្តង ។

ចំពោះរង្វាន់សម្រាប់ជ័យលាភីចូលរួមប្រកួតមានដូចជា៖ ជ័យលាភីលេខ១ ទទួលបានប្រាក់រង្វាន់ ១លាន​២សែនរៀល ជាមួយការស្នាក់នៅក្នុងសណ្ឋាគារផ្កាយ៥ ចំនួន១បន្ទប់ គ្រែ២ សម្រាប់​៣​យប់ នៅខេត្តសៀមរាប។ ជ័យលាភីលេខ២ ទទួលបានប្រាក់រង្វាន់៨សែនរៀល ជាមួយ​ការ​ស្នាក់​នៅ​ក្នុង​សណ្ឋាគារ​ផ្កាយ៤ចំនួន១បន្ទប់គ្រែ២ សម្រាប់៣យប់នៅខេត្តសៀមរាប និង​ជ័យ​លាភី​លេខ៣ ទទួលបានប្រាក់រង្វាន់៤សែនរៀល ជាមួយការស្នាក់នៅក្នុងសណ្ឋាគារផ្កាយ៣ ចំនួន​១​បន្ទប់​គ្រែ២ សម្រាប់៣យប់នៅខេត្តសៀមរាប។ ក្រៅពីនេះក៏មានរង្វាន់លើកទឹកចិត្ត និង​វត្ថុ​អនុស្សាវរីយ៍​ជាច្រើនទៀត។

ពាក់ព័ន្ធនឹងការរៀបចំកម្មវិធីសំណេរអង្គរនេះដែរ អាជ្ញាធរជាតិអប្សរា បាន​ចេញ​សេចក្តី​ជូន​ដំណឹង​ស្តីពី​ការ​បិទចរាចរណ៍បណ្តោះអាសន្ននៅស្ពានហាលខាងលិចប្រាសាទអង្គរ ចំនួន២ថ្ងៃ គិត​ចាប់​ពី​ថ្ងៃ​ទី២០ ដល់ថ្ងៃទី២១ខែមករា ឆ្នាំ២០២៤ ដើម្បីអនុញ្ញាតជូនក្រសួងអប់រំយុវជន និងកីឡា ក្រសួង​ទេសចរណ៍ ក្រសួងវប្បធម៌ និងវិចិត្រសិល្បៈ និងស្ថាប័នពាក់ព័ន្ធ រៀបចំកម្មវិធីសំណេរ អង្គរ​លើកទី១៕ អត្ថបទ៖ ទូច សោភ័ណ