រដ្ឋអាជ្ញាប្រទេសស្វ៊ីសកាលពីថ្ងៃសុក្រ បានបញ្ជាក់ថា ប្រធានាធិបតីអ៊ីស្រាអែល លោក Isaac Herzog គឺជាកម្មវត្ថុ នៃបណ្តឹងព្រហ្មទណ្ឌក្នុង​អំឡុង​ពេល​ដំណើរ​ទស្សនកិច្ច​របស់​លោក​ទៅ​កាន់​វេទិកា​សេដ្ឋកិច្ចពិភពលោកនៅទីក្រុងដាវូស ខណៈដែលអ៊ីស្រាអែលរកឃើញថា ខ្លួនត្រូវបាន​ចោទ​ប្រកាន់​ពី​បទ​ប្រព្រឹត្តឧក្រិដ្ឋកម្មសង្រ្គាម នៅតំបន់ហ្កាហ្សា។

ការិយាល័យអគ្គមេធាវីស្វ៊ីស បាននិយាយថា៖«បណ្តឹងព្រហ្មទណ្ឌ នឹងត្រូវបាន​ពិនិត្យ​តាម​នីតិ​វិធី​ធម្មតា» ដោយបន្ថែមថា ខ្លួននឹងទាក់ទងទៅក្រសួងការបរទេសស្វ៊ីស ដើម្បីពិនិត្យ​សំណួរ​អំពី​អភ័យ​ឯកសិទ្ធិ​របស់បុគ្គលដែលពាក់ព័ន្ធ។

ការិយាល័យអគ្គមេធាវីរបស់ប្រទេសស្វ៊ីស នឹងមិនបង្ហាញព័ត៌មានលម្អិតអំពីលក្ខណៈ ឬចំនួន​នៃ​ពាក្យ​បណ្តឹង ឬអ្នកដែលបានដាក់ពាក្យបណ្តឹងនោះទេ។

អ្នកនាំពាក្យ​ការិយាល័យរបស់ Herzog និងអ្នកនាំពាក្យរបស់រដ្ឋាភិបាល និងក្រសួង​ការ​បរទេស​អ៊ីស្រាអែល មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

លោក Herzog បាននិយាយនៅឯវេទិកាសេដ្ឋកិច្ចពិភពលោកកាលពីថ្ងៃព្រហស្បតិ៍ ជាទីដែល​លោក បានអំពាវនាវឲ្យសហគមន៍អន្តរជាតិ បដិសេធការ​អះអាង​អំពើ​ប្រល័យ​ពូជសា​សន៍​ប្រឆាំង​នឹង​អ៊ីស្រាអែល៕