មន្ត្រីកំពូលម្នាក់មកពីក្រុមសកម្មប្រយុទ្ធហេសបូឡាគាំទ្រដោយប្រទេសអ៊ីរ៉ង់នៃប្រទេសលីបង់ កាល​ពីថ្ងៃសុក្រ បានព្រមានអ៊ីស្រាអែលនឹង«ទទួលការបានការសងសឹក» ប្រសិន​បើ​ខ្លួន​ពង្រីក​ជម្លោះ​នៅ​តាម​ព្រំដែនលីបង់និងអ៊ីស្រាអែល។

ចាប់តាំងពីការវាយប្រហារដ៏គួរឲ្យភ្ញាក់ផ្អើលកាលពីថ្ងៃទី៧ ខែតុលា​ដោយ​ក្រុម​ហាម៉ាស​លើ​ភាគ​ខាង​ត្បូង​អ៊ីស្រាអែល មានការបាញ់គ្នាឆ្លងព្រំដែនស្ទើររៀងរាល់ថ្ងៃរវាងកងទ័ពអ៊ីស្រាអែល និង​ក្រុម​ហេសបូឡា ដែលជាសម្ព័ន្ធមិត្តរបស់ក្រុមសកម្មប្រយុទ្ធប៉ាឡេស្ទីន។

អ៊ីស្រាអែល បានទម្លាក់គ្រាប់បែកលើភូមិតាមព្រំដែនជាបន្តបន្ទាប់ ដោយអំពើហិង្សា បាន​សម្លាប់​មនុស្ស​ជាង ១៩៥នាក់ក្នុងប្រទេសលីបង់ រួមទាំងយុទ្ធជនហេសបូឡាយ៉ាងហោច១៤២នាក់ នេះ​បើ​យោង​តាមចំនួនសរុបរបស់សារព័ត៌មាន AFP។

នៅខាងអ៊ីស្រាអែល មនុស្ស ១៥នាក់ ត្រូវបានសម្លាប់ ក្នុងនោះ៩នាក់ជាទាហាន និង ៦នាក់​ជា​ជន​ស៊ីវិល នេះបើយោងតាមកងទ័ពអ៊ីស្រាអែល។

លោក Naim Qassem មេដឹកនាំលំដាប់លេខ២របស់ក្រុម ហេសបូឡា បាននិយាយ​ក្នុង​សេចក្តី​ថ្លែង​ការណ៍មួយថា «ប្រសិនបើអ៊ីស្រាអែលសម្រេចចិត្តពង្រីកការឈ្លានពានរបស់ខ្លួន ប្រទេស​នឹង​ទទួល​រងការវាយប្រហារយ៉ាងពិតប្រាកដ ជាការឆ្លើយតប»។