ភ្នំពេញ៖ បើតាមអគ្គនាយកមជ្ឈមណ្ឌលជាតិរក្សាសន្តិភាព បានអោយដឹងថា នៅពេលបច្ចុប្បន្ន កងទ័ពមួកខៀវកម្ពុជា ដែលកំពុងឈរជើងបំពេញបេសកកម្មថែរក្សាសន្តិភាពអង្គការសហប្រជាជាតិ នៅតាមបណ្តាប្រទេសចំនួន៥ ដែលកំពុងមានជម្លោះសង្គ្រាម គឺបាននិងកំពុងទទួលបានការចាក់វ៉ាក់សាំងការពារកូវីដ-១៩ បន្តបន្ទាប់ពីអង្គការសហប្រជាជាតិ។
នាយឧត្តមសេនីយ សែម សុវណ្ណនី អនុប្រធានគណៈកម្មាធិការសម្របសម្រួលការបញ្ជូនកងម្លាំងមួកខៀវ និងជាអគ្គនាយកមជ្ឈមណ្ឌលជាតិថែរក្សាសន្តិភាព បានថ្លែងប្រាប់នៅថ្ងៃទី២៥ ខែមិថុនានេះថា នៅពេលបច្ចុប្បន្នកម្ពុជា មានកងទ័ពមួកខៀវកម្ពុជា ប្រមាណ៨០០នាក់ ដែលបាននិងកំពុងបំពេញបេសកកម្មថែរក្សាសន្តិភាពអង្គការសហប្រជាជាតិនៅបណ្តាប្រទេសចំនួន ៥ រួមមាន៖ ប្រទេសស៊ូដង់ ស៊ូដង់ខាងត្បូង ប្រទេសលីបង់ អាហ្វ្រឹកកណ្តាល ប្រទេសម៉ាលី គឺបាននិងកំពុងទទួលការចាក់វ៉ាក់សាំងការពារកូវីដ១៩ ទាំងអស់គ្នាពីសំណាក់អង្គការសហប្រជាជាតិ។
ឯកឧត្តម បន្តថា វ៉ាក់សាំងការពារកូវីដ១៩ដែលទ័ពមួកខៀវកម្ពុជា បាននិងកំពុងចាក់នោះ គឺជាវ៉ាក់សាំងប្រភេទអាស្ត្រាហ្សេណេកា ដែលផ្តល់ជំនួយអោយចាក់ដោយប្រទេសឥណ្ឌា។
ឯកឧត្ដម សែម សុវណ្ណនី បន្តថា ក្នុងចំណោមទ័ពមួកខៀវកម្ពុជា ប្រមាណជិត៨០០នាក់នោះ គឺបានទទួលចាក់វ៉ាក់សាំងការពារកូវីដ១៩ទាំងអស់គ្នា ក្នុងនោះ ដូសទី២ កំពុងចាក់បានប្រមាណជាង៤០% ហើយមានទ័ពមួកខៀវប្រមាណជិត៦០%ទៀត ដែលបានចាក់ដូសទី១ កំពុងរងចាំចាក់ដូសទី២ទៀត។
ឯកឧត្ដម បានបន្ថែមថា តាមរយៈពេលការចាក់វ៉ាក់សាំងការពារកូវីដ-១៩ជូនទ័ពមួកខៀវកម្ពុជា កំពុងឈរជើងនៅតាមបណ្តាប្រទេសកំពុងមានជម្លោះសង្គ្រាមនេះ គឺបានធ្វើអោយទ័ពមួកខៀវយើងមានកម្លាំងចិត្តធ្វើការងារជាខ្លាំង ហើយយើងក៏ត្រូវបង្កើនការពារខ្លួនតាមរយៈការអនុវត្តវិធានការ៣កុំ៣ការពារអោយបានខ្លាំងក្លាថែមទៀត ខណៈដែលបច្ចុប្បន្ន បណ្តាប្រទេសតាមតំបន់បេសកកម្មរបស់យើង គឺកំពុងមានជម្លោះសង្គ្រាម និងមានករណីកូវីដ១៩ឆ្លងរាតត្បាតច្រើន ហើយបច្ចុប្បន្នបណ្តាប្រទេសទាំងនោះ ក៏មិនទាន់បានគិតគូរអំពីការចាក់វ៉ាក់សាំងការពារកូវីដ-១៩នោះទេ៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
