ស៊ីរី ៖ ការវាយប្រហារដោយមីស៊ីលនៅក្នុងប្រទេសស៊ីរី លីបង់ អ៊ីរ៉ាក់ និងយេម៉ែន កាលពីថ្ងៃសៅរ៍ ទី២០ មករា បានធ្វើឱ្យមានការផ្តោតអារម្មណ៍យ៉ាងខ្លាំង លើការកើនឡើងហានិភ័យនៃសង្រ្គាមនៅតំបន់ហ្កាហ្សា ដែលបង្កឱ្យមានជម្លោះក្នុងតំបន់កាន់តែធំ រវាងអ៊ីរ៉ង់ និងសម្ព័ន្ធមិត្តប្រឆាំង នឹងអ៊ីស្រាអែល និងសហរដ្ឋអាមេរិក។

អ៊ីរ៉ង់បាននិយាយថា ឆ្មាំបដិវត្តន៍របស់ខ្លួនចំនួន៥នាក់បានស្លាប់នៅក្នុងការវាយប្រហារដោយមីស៊ីលទៅលើផ្ទះមួយក្នុងទីក្រុងដាម៉ាស់ (Damascus)ប្រទេសស៊ីរី ដែលខ្លួនបានស្តីបន្ទោសទៅលើអ៊ីស្រាអែល ហើយប្រភពសន្តិសុខនៅក្នុងប្រទេសលីបង់បាននិយាយថា ការវាយប្រហាររបស់អ៊ីស្រាអែលនៅទីនោះបានសម្លាប់សមាជិកក្រុមហេសបូឡាម្នាក់ដែលជាក្រុមគាំទ្រដោយអ៊ីរ៉ង់។ 

ក្រោយមកកាលពីថ្ងៃសៅរ៍ មន្ត្រីអាមេរិកម្នាក់បាននិយាយថា ការវាយប្រហារដោយមីស៊ីល ឬគ្រាប់រ៉ូកែតបានធ្វើឱ្យបុគ្គលិកអាមេរិកម្នាក់រងរបួសនៅឯមូលដ្ឋានមួយក្នុងប្រទេសអ៊ីរ៉ាក់ ជាប្រទេសដែលក្រុម គាំទ្រដោយអ៊ីរ៉ង់ ធ្លាប់បានប្រយុទ្ធជាមួយកងកម្លាំងសហរដ្ឋអាមេរិក។ 

សហរដ្ឋអាមេរិកក៏បាននិយាយផងដែរថា ខ្លួនបានដាក់គោលដៅដោយការបាញ់មីស៊ីល លើក្រុមហ៊ួទី( Houthi) គាំទ្រដោយអ៊ីរ៉ង់ក្នុងប្រទេសយេម៉ែន ពេលកំពុងចូលទៅក្នុងសមុទ្រក្រហម ដែលខ្លួនហៅថាការគំរាមកំហែងដល់ការដឹកជញ្ជូនតាមសមុទ្រ ។   

ក្រុមអ្នកស្រុកបាននិយាយថា អ៊ីស្រាអែលបានវាយលុកដាក់គោលដៅនៅទូទាំងតំបន់ហ្កាហ្សាស្ទ្រីប កាលពីថ្ងៃសៅរ៍ ខណៈយន្តហោះរបស់ខ្លួនបានទម្លាក់ខិត្តប័ណ្ណនៅលើតំបន់ភាគខាងត្បូងតំបន់រ៉ាហ្វា ( Rafah) ដោយជំរុញឱ្យប្រជាជនប៉ាឡេស្ទីនដែលកំពុងស្វែងរកការជ្រកកោននៅទីនោះ ជួយស្វែងរកចំណាប់ខ្មាំងដែលក្រុមហាម៉ាស់កំពុងឃុំខ្លួន៕