មនុស្សរាប់ម៉ឺននាក់បានប្រមូលផ្តុំគ្នានៅទូទាំងប្រទេសអាល្លឺម៉ង់ តវ៉ាប្រឆាំងនឹងគណបក្សនយោបាយស្តាំនិយម និងជំហររបស់ខ្លួនប្រឆាំងនឹងជនអន្តោប្រវេសន៍។   

ប្រព័ន្ធផ្សព្វផ្សាយអាល្លឺម៉ង់បានរាយការណ៍ថា ប្រជាជនបានតវ៉ានៅក្នុងទីក្រុង និងទីប្រជុំជនតូចៗជាច្រើនកាលពីថ្ងៃសៅរ៍ ដោយមានអ្នកខ្លះចំអកឱ្យគណបក្សជម្រើសសម្រាប់ប្រទេសអាល្លឺម៉ង់ (AfD) អមដោយសញ្ញាថា "Facism មិនមែនជាជម្រើស" ។   

ការតវ៉ានេះកើតឡើងក្រោយមានការផ្ទុះកំហឹងបន្ទាប់ពីត្រូវបានគេបង្ហាញថាសមាជិកគណបក្ស AfD បានជួបប្រជុំជាមួយសកម្មជនស្តាំនិយម ហើយពិភាក្សាអំពីផែនការក្នុងការនិរទេសជនបរទេសដ៏ច្រើនសន្ធឹកសន្ធាប់។  

នគរបាលបាននិយាយថាមនុស្សប្រហែល ៣៥.០០០នាក់ បានចូលរួមការអំពាវនាវមួយនៅក្រោមបដា "ការពារលទ្ធិប្រជាធិបតេយ្យ - ហ្វ្រែងហ្វើត (Frankfurt) ប្រឆាំងគណប្ស AfD" ដោយដើរក្បួននៅកណ្ដាល ក្រុងហិរញ្ញវត្ថុរបស់ប្រទេសអាល្លឺម៉ង់។ 

ដោយមានចំនួនអ្នកចូលរួមស្រដៀងគ្នានេះ ខ្លះកាន់ផ្ទាំងរូបភាពដូចជា "ណាស៊ីសរលាយទៅ" បានកើតឡើងនៅទីក្រុង Hanover ភាគខាងជើង ។ ចំណែក មនុស្សចំនួន ៣០.០០០នាក់ ផ្សេងទៀតបានចេញមកនៅទីក្រុង Dortmund ភាគខាងលិច។  

ការតវ៉ាក៏ត្រូវបានធ្វើឡើងផងដែរនៅក្នុងទីក្រុងនានារួមមានទីក្រុង Braunschweig, Erfurt និង ទីក្រុង Kassel ក៏ដូចជាទីក្រុងតូចៗជាច្រើនទៀត ដោយឆ្លុះបញ្ហាញពីការប្រមូលផ្តុំជារៀងរាល់ថ្ងៃកាលពីសប្តាហ៍មុន។

ទូរទស្សន៍សាធារណៈ ARD របស់ប្រទេសអាល្លឺម៉ង់បានដាក់ចំនួនអ្នកទៅចូលរួមក្បួនតវ៉ាសរុបកាលពីថ្ងៃសៅរ៍មានជាង ២០០.០០០នាក់៕