ព្រៃវែង ៖ សមាគមយុវជនខ្មែរមហានគរ នៃបណ្តុំអង្គការសង្គមស៊ីវិល ដឹកនាំដោយលោក ហេង សំណាង និងលោក ពៅ សុជាតិ សហការដោយ លោកស្រីអភិបាលរងស្រុក ឡេង លក្ខណា តំណាងអភិបាលស្រុក លោក ឡាយ សំអឿន លោកនាយកសាលា ប៉ូច ឆៃលីម រួមជាមួយអាជ្ញាធរមូលដ្ឋាន បាននាំយកសម្ភារៈសិក្សាចែកជូនសិស្សានុសិស្ស ១៣៩ នាក់ និងដាំកូនឈើក្នុងបរិវេណសាលាបឋមសិក្សាពងពស់ ស្ថិតនៅភូមិពងពស់ ឃុំរោងដំរី ស្រុកបាភ្នំ ខេត្តព្រៃវែង កាលពីព្រឹកថ្ងៃទី២១ ខែមករា ឆ្នាំ២០២៤ ។

ក្រុមយុវជនសង្គមសុីវិល ថ្លែងឲ្យដឹងថា ការជួបជុំនាពេលនេះ គឺដើម្បីការផ្តល់សម្ភារៈសិក្សាដល់សិស្សនុសិស្សសាលាបឋមសិក្សាពងពស់ និងជាពិសេសដើម្បីឲ្យសិស្សានុសិស្សបានយល់ដឹងអំពីបរិស្ថានក្រោមប្រធានបទ “យើងរួមគ្នាកាត់បន្ថយការប្រើប្រាស់ថង់ប្លាស្ទិក ឬថ្ងៃនេះ ខ្ញុំមិនប្រើប្រាស់ថង់ប្លាស្ទិក” ពិសេសការដាំកូនឈើក្នុងបរិវេណសាលា ជាចំណែកមួយ ដើម្បីឲ្យសិស្សានុសិស្ស បានយល់ដឹងអំពីអត្ថប្រយោជន៍ធនធានធម្មជាតិផង ក៏ដូចជាបង្ហាញឲ្យកុមារ កុមារី បានរួមគ្នាដាំ ដើម្បីប្រព័ន្ធអេកូឡូសុី បរិស្ថានធម្មជាតិ។  

លោក ហេង សំណាង បានបន្តថា ការជួបជុំនេះ ក៏បង្ហាញពីវប្បធម៌ចែករំលែកទៅដល់សិស្សានុសិស្សឲ្យមានសម្ភារៈសិក្សាដើម្បីបង្កើនការចេះដឹង ពិសេស ស្តីអំពីការចូលរួមថែរក្សា ស្រឡាញ់ នូវសម្បត្តិធនធានធម្មជាតិ ឲ្យស្របទៅតាមគោលនយោបាយរបស់ ក្រសួងអប់រំ យុវជន និងកីឡា និងក្រសួងបរិស្ថាន ពិសេសគោលនយោបាយយុទ្ធសាស្រ្តបញ្ចកោន ដំណាក់កាលទី១ ក្រោមការដឹកនាំប្រកបដោយគតិបណ្ឌិតសម្តេចធិបតី ហ៊ុន ម៉ាណែត និងធនធានមនុស្សជាអទិភាពដើម្បីអភិវឌ្ឍន៍ប្រទេសទៅថ្ងៃអនាគតបន្ត។

 ចំណែកលោក អភិបាលរងស្រុក ឡេង លក្ខណា រួមទាំងអាជ្ញាធរដែនដី ក្រុមប្រឹក្សាស្រុក ឃុំ បានថ្លែងអំណរគុណដល់ គោលនយោបាយ រាជរដ្ឋាភិបាល ក្រោមការដឹកនាំសម្តេចមហាមហាបវរធិបតី ហ៊ុន ម៉ាណែត ដែលបានយកចិត្តទុកដាក់លើវិស័យអប់រំ និងបរិស្ថាន នៅថ្នាក់មូលដ្ឋាន ដែលជាគ្រឹះធនធានមនុស្ស និងជាផ្នែកមួយចូលរួមចំណែកអភិវឌ្ឍន៍សង្គមក្រោមដំបូល សន្តិភាព របស់សម្តេចអគ្គមហាសេនាបតីតេជោ ហ៊ុន សែន៕ ដោយ ៖ ដារា