ការស្លាប់ទាក់ទងនឹងអាកាសធាតុជិត ៩០ នាក់ត្រូវបានកត់ត្រានៅទូទាំងសហរដ្ឋអាមេរិក បន្ទាប់​ពី​ប្រទេសនេះ ត្រូវបានរងការវាយប្រហារដោយព្យុះរដូវរងាដ៏ខ្លាំងក្លាសម្រាប់សប្តាហ៍មុន។  

អ្នក​ស្លាប់​រួមមានយ៉ាងហោចណាស់ ២៥នាក់នៅក្នុងរដ្ឋ ធិនណេសស៊ី(Tennessee) និង ១៦នាក់​នៅ​រដ្ឋអូរ៉េហ្គិន (Oregon) ដែលនៅតែ​ស្ថិត​ក្នុង​ភាព​អាសន្ន​បន្ទាប់​ពី​មាន​ព្យុះ​ទឹក​កក​ធ្ងន់ធ្ងរ​។ 

មនុស្ស​រាប់ម៉ឺននាក់ក៏នៅតែគ្មានថាមពលអគ្គិសនីប្រើប្រាស់​នៅទូទាំង​តំបន់​ជា​ច្រើន​របស់​ប្រទេស​នេះ​។ គេរំពឹងថា​ស្ថានភាពត្រជាក់ខ្លាំង នឹងបន្តរហូតដល់ពាក់កណ្តាលសប្តាហ៍នេះ។

យោង​​តាម​ចំនួនសរុបតាមដានដោយសារព័ត៌មាន CBS ដែលជាដៃគូរបស់ទូរទស្សន៍ BBC របស់​សហរដ្ឋអាមេរិក ចំនួនអ្នក​ស្លាប់​ដោយ​សារ​អាកាស​ធាតុ​សរុប​ចំនួន​ ៨៩នាក់​ត្រូវ​បាន​កត់​ត្រា​នៅ​ទូទាំង​ប្រទេស​ក្នុងរយៈពេលមួយសប្តាហ៍កន្លងមកនេះ ។   

ខណៈ​មនុស្សស្លាប់មានចំនួនច្រើនបំផុតនៅក្នុងរដ្ឋ Tennessee និង Oregon ការស្លាប់​ក៏​ត្រូវ​បាន​គេរាយការណ៍ផងដែរនៅក្នុងរដ្ឋ Illinois រដ្ឋ Pennsylvania រដ្ឋ Mississippi, រដ្ឋ Washington រដ្ឋ Kentucky រដ្ឋ Wisconsin រដ្ឋ New York រដ្ឋ New Jersey និងកន្លែង​ផ្សេង​ទៀត​។

នៅ​ក្នុង​ឧបទ្ទវហេតុមួយនៅទីក្រុង Portland រដ្ឋ Oregon កាលពីថ្ងៃពុធកន្លងទៅ មនុស្ស ៣នា​ក់​ត្រូវ​បាន​អគ្គិសនីឆក់ស្លាប់ នៅពេលខ្យល់បក់ខ្លាំងបានបណ្តាលឱ្យបង្គោលខ្សែភ្លើងរលំ និង​វាយ​ប្រហារ​រថយន្តដែលពួកគេកំពុងធ្វើដំណើរ។ ទារកម្នាក់ដែលនៅក្នុងរថយន្តនោះបានរួចជីវិត៕