យោងតាមផេកហ្វេសបុករបស់ឯកឧត្តម ហេង រតនា ប្រតិភូរាជរដ្ឋាភិបាលកម្ពុជា​ទទួល​បន្ទុក​ជា​អគ្គ​នាយក​មជ្ឈមណ្ឌល​សកម្មភាពកំចាត់មីនកម្ពុជា(ស៊ីម៉ាក់) បានឲ្យដឹងថា នៅល្ងាចថ្ងៃទី២០​ ខែមករា​ ឆ្នាំ២០២៤ នៅព្រះបរមរាជវាំងរាជធានីភ្នំពេញ​ ក្នុងនាម​ថ្នាក់​ដឹកនាំ និង​មន្ដ្រី​ទាំង​អស់​នៃ​មជ្ឈ​មណ្ឌល​សកម្មភាពកំចាត់មីនកម្ពុជា បានទទួលព្រះរាជអំណោយ​ដ៏​មហាថ្លៃថ្លា​បំផុត​ពី​សម្ដេច​ព្រះមហាក្សត្រី នរោត្តម មុនិនាថ សីហនុ ព្រះ​វររាជមាតា​ជាតិ​ខ្មែរ ក្នុង​សេរី​ភាព​ សេចក្តី​​ថ្លៃ​ថ្នូរ និង​សុភមង្គល​​ នូវទឹកប្រាក់ ចំនួន ៥០.០០០​ (ប្រាំម៉ឺន) ដុល្លារអាមេរិក​ ដល់​មជ្ឈ​មណ្ឌល​សកម្មភាព​កំចាត់​មីន​កម្ពុជា (ស៊ីម៉ាក់)។

នៅក្នុងសំណេរនេះឯកឧត្តម ហេង រតនា ក៏សូមព្រះ​បរមរា​ជា​នុញ្ញាត​លំឱន​កាយ​ថ្វាយ​នូវ​សេចក្ដី​ថ្លែង​អំណរ​ព្រះម​ហា​រករុណាទិគុណ និងកត្តញ្ញូតាធម៌ដ៏ជ្រាលជ្រៅបំផុតថ្វាយ សម្ដេច​ព្រះ​មហា​ក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែល​ព្រះអង្គ​សព្វ​ព្រះរាជ​ហឬទ័យ​ប្រោសប្រទានព្រះរាជទ្រព្យដ៏ថ្លៃថ្លាបំផុតចំនួន ៥០.០០០​ (ប្រាំម៉ឺន)ដុ​ល្លារអាមេរិក​ ដល់​មជ្ឈ​មណ្ឌល​សកម្មភាពកំចាត់មីនកម្ពុជា (ស៊ីម៉ាក់) ដើម្បីប្រើប្រាស់ក្នុងបុព្វហេតុរបស់ខ្លួន។ 

ឯកឧត្តម ហេង រតនា បានបន្តថា ព្រះរាជអំណោយដ៏ថ្លៃថ្លាបំផុតរបស់សម្ដេចព្រះមហាក្សត្រី ព្រះ​វរ​រាជ​មាតា​ជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតនាពេលនេះ ក៏ដូចជាពេលកន្លងមក ទាំង​ព្រះរាជ​អំណាយជាថវិកា និងជាសម្ភារៈ បានចូលរួម​ចំណែក​យ៉ាងសំខាន់​ក្នុង​ការ​កាត់​បន្ថយ​អត្រា​គ្រោះ​ថ្នាក់​ដោយ​សារមីន រំដោះផ្ទៃដីសុវត្ថិភាពជូនប្រជាពលរដ្ឋសម្រាប់បង្កបង្កើនផល លើក​កម្ពស់​ជីវភាព​រស់​នៅ និងគាំទ្រការអភិវឌ្ឍន៍សហគមន៍មូលដ្ឋាន ជាពិសេសបាន​បង្ហាញ​ពី​ព្រះរាជ​ហឬទ័យ​ទុកដាក់ខ្ពស់​បំផុត​ដល់​កងកម្លាំងដោះមីនទាំងអស់របស់អង្គភាព CMAC ដែល​កំពុង​បំពេញ​កិច្ច​ប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម។

ឯកឧត្តម ហេង រតនា ក្នុងនាមថ្នាក់​ដឹកនាំ និង​មន្ដ្រី​ទាំង​អស់​នៃ​មជ្ឈ​មណ្ឌល​សកម្មភាព​កំចាត់​មីន​កម្ពុជា​ សូមលំឱនកាយលើកអញ្ជលីប្រណមបួងសួងដល់គុណបុណ្យព្រះរតនត្រ័យកែវទាំងបី ទេវតា​ថែរ​ក្សាព្រះមហាស្វេតច្ឆ័ត្រ និងព្រះបារមីនៃអតីតព្រះមហាក្សត្រ ព្រះមហាក្សត្រី​យានី​ខ្មែរ​គ្រប់​ព្រះអង្គ និងវត្ថុស័ក្ដិសិទ្ធិក្នុងលោក សូមជួយបីបាច់តាមថែរក្សា និងប្រោះ​ព្រំ​ព្រះសព្វ​សាធុ​ការពរ បវរមហាប្រសើរថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទី​គោរព​សក្ការៈ​ដ៏​ខ្ពង់​ខ្ពស់​បំផុត សូមព្រះអង្គទ្រង់មានព្រះកាយពលមាំមួន ព្រះរាជសុខភាពល្អបរិបូណ៍ ព្រះរា​ជ​បញ្ញា​ញាណវា​ងវៃ ព្រះជន្មាយុយឺនយូរជាងរយព្រះវស្សា ចាកផុតពីព្រះរោគាព្យាធិនានា ដើម្បី​ទ្រង់​គង់​ប្រថាប់​ជាម្លប់ដ៏ត្រជាក់ត្រជុំរបស់ប្រជានុរាស្រ្ដខ្មែរជាកូនជាចៅ រស់នៅប្រកប​ដោយ​សុខ​សន្ដិភាព និងវឌ្ឍនភាពជានិរន្ដន៍តរៀងទៅ៕ អត្ថបទ៖ ភារម្យ