ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា បានអនុញ្ញាតឱ្យលោក អែលឌីរ ជីវិន​ឡាន (ELDER DALE G.RENLUND) ថ្នាក់ដឹកនាំជាន់ខ្ពស់សាសនាចក្រ នៃ​ព្រះយេស៊ូ​គ្រីស្ទ នៅសហរដ្ឋអាមេរិក(LDS) ដឹកនាំគ្រីស្ទបរិស័ទថ្ងៃចុងក្រោយ ចូលជួបសម្តែងការគួរសម និង​ពិភាក្សា​ការងារ នាព្រឹកថ្ងៃទី២២ ខែមករា ឆ្នាំ២០២៤នេះ នៅទីស្តីការក្រសួង។

លោក អែលឌីរ ជីវិនឡាន (ELDER DALE G.RENLUND) បាន​សម្តែង​នៅ​ការ​អរគុណ​ប្រមុខ​រាជ​រដ្ឋាភិបាលកម្ពុជា ដែលតែងតែសហការ និងផ្តល់ការទុកចិត្ត ឲ្យវត្តមានសាសនាចក្រ នៃ​ព្រះ​យេស៊ូ​គ្រីស្ទ នៅសហរដ្ឋអាមេរិក(LDS) ដឹកនាំគ្រីស្ទបរិស័ទថ្ងៃចុងក្រោយ ធ្វើកា​រ​យ៉ាង​សកម្ម​ជាមួយ​ក្រសួងធម្មការ និងសាសនា ចាប់តាំងពីអាណត្តិទី៤ រហូតដល់អាណត្តិទី៧ថ្មីនេះ។ ជា​មួយ​គ្នា​នេះ លោក បានជម្រាបជូន ឯកឧត្តមរដ្ឋមន្រ្តី អំពីការងារសំខាន់ៗចំនួន៣ ដែលក្រុម​ការងារ​របស់​សាសនាចក្រ ធ្វើការកន្លងមកនៅព្រះរាជាណាចក្រកម្ពុជា ដោយផ្តោត​សំខាន់​ទៅ​លើ​ការ​អប់រំ សុខាភិបាល និងទឹកស្អាតជាដើម។

ជាការឆ្លើយតបឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា បាន​ស្វាគមន៍​យ៉ាង​កក់​ក្តៅ និងគាំទ្រយ៉ាងពេញទំហឹងជាមួយការងារមនុស្សធម៌ របស់សាសនាចក្រ នៃព្រះយេស៊ូគ្រីស្ទ នៅ​សហរដ្ឋអាមេរិក ដែលបានរួមចំណែកជាមួយរាជរដ្ឋាភិបាលកម្ពុជា ពិសេស​បាន​សហការ​យ៉ាង​ជិត​ស្និត​ជាមួយក្រសួងធម្មការ និងសាសនា នៅក្នុងវិស័យអាទិភាពសំខាន់ចំនួន៣គឺ ការអប់រំ សុខាភិបាល និងទឹកស្អាត ដែលបាន​ចំណាយ​ទឹក​ប្រាក់​អស់​ប្រមាណ​២២​លាន​ដុល្លារ​សហរដ្ឋ​អាមេរិក​។

នាឱកាសនោះឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា សង្ឃឹមថា លោក អែលឌីរ ជីវិនឡាន (ELDER DALE G.RENLUND) និងពិចារណាជួយលើវិស័យអប់រំ សុខាភិបាល និងទឹកស្អាត នៅក្នុងមូលដ្ឋានស្រុកតំបែរ ស្រុកក្រូចឆ្មា និងស្រុកមេមុត ខេត្តត្បូងឃ្មុំ ដែល​ជា​ទីតាំងប្រវត្តិសាស្រ្ត របស់ថ្នាក់ដឹកនាំកម្ពុជា ក្នុងការដណ្តើមសេរីភាព និង​សន្តិភាព​ជូន​ប្រជាជន​កម្ពុជា ទៅតាមលទ្ធភាព ដើម្បីបន្តរួមចំណែកអភិវឌ្ឍន៏ជាមួយរាជរដ្ឋាភិបាលកម្ពុជា តាម​រយៈ​ក្រសួងធម្មការ និងសាសនា។

នៅក្នុងដំណើរ​ទស្សនកិច្ចនេះ ឯកឧត្តម ចាយ បូរិន សូមជូនពរលោក អែលឌីរ ជីវិនឡាន (ELDER DALE G.RENLUND) និងគណៈប្រតិភូសាសនាចក្រ ដែលបាន​អញ្ជើញ​មក​ពី​សហរដ្ឋ​អាមេរិក ទទួលបាននៅសុវត្ថិភាពក្នុងការធ្វើដំណើរ និងទទួលបានជោគជ័យគ្រប់ភារកិច្ច លើ​គ្រប់​រូប​ភាព​មនុស្ស​ធម៌​ផ្សេងៗ ជាមួយប្រជាជនកម្ពុជា ពិសេសសូមស្វាគមន៍​យ៉ាង​កក់​ក្តៅ​នៅ​ការ​វិល​ត្រលប់​ជា​ថ្មី​ម្តងទៀតរបស់លោក និងគណៈប្រតិភូសាសនាចក្រមកលើទឹកដីកម្ពុជា៕ អត្ថបទ៖ រដ្ឋា