លោក សែម ប៉ាត នាយកនៃមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគីរីបានលើកឡើងថា វគ្គ​បណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល គឺជាឱកាសល្អ​សម្រាប់​ខ្មែរ​ជនជាតិ​ដើម​ភាគតិច​ដើម្បី​ប្រែក្លាយ​ពី​ការ​ប្រកប​របរ​បែប​ប្រពៃណី​មក​ជា​របរ​បែប​បច្ចេក​ទេស​វិជ្ជាជីវៈ​ដែល​មានចំណូលខ្ពស់ និងមានភាពឋិតថេរ។

ការលើកឡើងបែបនេះបន្ទាប់ពីក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី១៥ ខែមករា ឆ្នាំ២០២៤កន្លងទៅបានបើកបវេសនកាលជាផ្លូវការការបណ្តុះបណ្តាលជំនាញវិជ្ជាជីវៈ និង​បច្ចេកទេស ១,៥លាននាក់ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។

លោកថា «យើង​ដឹង​ហើយ​ថា​បង​ប្អូន​ជន​ជាតិ​ដើម​របស់​យើង​គាត់​ចូល​ព្រៃ​អាស្រ័យ​ផល​ដែល​ជា​មុខរបរ​ចិញ្ចឹម​ជីវិតជាប្រពៃណីរបស់ពួកគេ ប៉ុន្តែចាប់តាំង​ពី​បើក​ឱ្យ​មាន​ការ​ចុះ​ឈ្មោះ​ចូល​រៀន​ជំនាញ​របស់​រាជរដ្ឋាភិបាល យើងឃើញមាន​ជនជាតិ​ភាគតិច​របស់​យើង​មក​ចុះ​ឈ្មោះចូ​ល​រៀន​ដែរ​»​។

បើតាមលោក សែម ប៉ាត វិទ្យាស្ថាន បានទទួល​យុវជមក​ដែល​ជា​ជន​ជាតិ​ដើម​ភាគ​តិច​មក​ចុះ​ឈ្មោះ​រៀន​ជំនាញវិជ្ជាជីវៈ និងបច្ចេកទេសចំនួន៦១នាក់ដែលភាគច្រើនជាជនជាតិ ព្រៅ កាវ៉ែត ទំពួន គ្រឹង ចារ៉ាយ កាចក់ និងឡាវ ហើយសិក្ខាកាមភាគច្រើន ស្រឡាញ់​ជំនាញ​សេវា​កម្ម​សម្អាង​ការ​ រចនាក្រាហ្វិកដោយកុំព្យូទ័រ ដំឡើងបណ្ដាញអគ្គីសនី និងសេវាកម្មកាត់សក់។

លោក សែម ប៉ាត បន្តថា ចាប់តាំងពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានប្រកាសដាក់ឱ្យអនុវត្តជាផ្លូវការនូវវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស ដល់​យុវជនមកពីគ្រួសារក្រីក្រ និងគ្រួសារងាយរងហានិភ័យ ១.៥ លាននាក់នៅថ្ងៃទី១៤ វិច្ឆិកា ឆ្នាំ២០២៣ មជ្ឈមណ្ឌល​បណ្តុះ​បណ្តាល​វិជ្ជាជីវៈ​ខេត្ត​រតនគីរី​បាន​ទទួល​យុវជន​មក​ចុះ​ឈ្មោះ​ចូល​រៀន​បាន​ចំនួន ២៤០នាក់ ស្រី ៩៧នាក់ លើជំនាញចំនួន ៥ ដែលជាជំនាញ​មាន​តម្រូ​វ​ការ​ទីផ្សារ​ការងារ​ខ្ពស់ តាមបណ្តាក្រុមហ៊ុនសហគ្រាស និងមានប្រាក់ចំណូលសមរម្យនាពេលបច្ចុប្បន្ននេះ។

សូមបញ្ជាក់ថា កាលពីថ្ងៃទី១៤ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានដាក់ឱ្យអនុវត្តជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់គ្រួសារក្រីក្រ និងគ្រួសារងាយរងហានិភ័យ ចំនួន ១លាន ៥សែននាក់ ដែលមានរយៈពេល ៤ខែ សិក្សាដោយឥតគិតថ្លៃ ម្យ៉ាងវិញទៀត យុវជនដែលមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀល រហូតដល់បញ្ចប់ការសិក្សា៕