ក្រសួងព័ត៌មាន និងខេត្តសៀមរាប បានបញ្ចប់ការប្រកាសទ្រព្យសម្បត្តិ និងបំណុល តាមរបប ០២ឆ្នាំ ឆ្នាំ២០២៤ ដែលការប្រកាសទ្រព្យសម្បត្តិ និងបំណុលសរុបមានកំណើនដល់ចំនួន ៩៤.៦៦%។

ក្រុមការងារនាយកដ្ឋានប្រកាសទ្រព្យសម្បត្តិ និងបំណុល នៃអង្គភាព​ប្រឆាំង​អំពើ​ពុករលួយ​បាន​ឱ្យ​ដឹងថា នាព្រឹកថ្ងៃទី២២ ខែមករា ឆ្នាំ២០២៤ នេះ ក្រសួងព័ត៌មាន និងខេត្តសៀមរាប បាន​បញ្ចប់​ការប្រកាសទ្រព្យសម្បត្តិ និងបំណុលទាំងស្រុង ១០០%។

អង្គភាពប្រឆាំងអំពើពុករលួយបានឱ្យដឹងថា សម្រាប់វឌ្ឍនភាព គិតត្រឹមដើមសប្ដាហ៍ទី៤ នេះ ការ​មក​ប្រកាសទ្រព្យសម្បត្តិ និងបំណុល នៅទូទាំងប្រទេស ដែលបានបញ្ចប់ការប្រកាស ១០០% មាន​ក្រសួង-ស្ថាប័ន និងរាជធានី-ខេត្ត សរុបចំនួន ៣៣។ តាមតុល្យការក្នុងដើមសប្ដាហ៍ទី៤ នេះ ឃើញថា ការបញ្ចប់ការប្រកាសទ្រព្យសម្បត្តិ និងបំណុលមានកំណើន ២៣ ក្រសួង-ស្ថាប័ន រាជ​ធានី-ខេត្ត ដោយធៀបនឹងសប្ដាហ៍ទី១ គឺមានតែ១០ ក្រសួង-ស្ថាប័ន រាជធានី-ខេត្ត តែប៉ុណ្ណោះ ដែល​បាន​បញ្ចប់ការប្រកាសទ្រព្យសម្បត្តិ និងបំណុលរបស់ខ្លួន ១០០%។

ក្រុមការងារនាយកដ្ឋានប្រកាសទ្រព្យសម្បត្តិ និងបំណុល បានទទួលទិន្នន័យជាបឋម គិតត្រឹម​ព្រឹក​​ថ្ងៃ​ទី២២ ខែមករា ឆ្នាំ២០២៤ នេះ បានចំនួន ៩៤.៦៦% នៃចំនួនបុគ្គលត្រូវ​ប្រកា​ស​ទ្រព្យ​សម្បត្តិ និងបំណុល សរុបចំនួន ១៨,២៧៩ រូប។

សូមបញ្ជាក់ថា ក្រុមការងារនៃនាយកដ្ឋានប្រកាសទ្រព្យសម្បត្តិ និងបំណុល នឹង​រង់ចាំ​ទទួល​ឯកសារ​ប្រកាស០៧ថ្ងៃ ក្នុងមួយសប្ដាហ៍ គិតចាប់ពីថ្ងៃទី០១ រហូតដល់ថ្ងៃទី៣១ ខែមករា ឆ្នាំ​២០២៤ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ និងចាប់ពី​ម៉ោង​០៨:០០​ព្រឹក​​ដល់​ម៉ោង០៥:០០ល្ងាច៕ អត្ថបទ ៖ ប្រាក់ វ៉ាន់ដា