ព្យុះអ៊ីស្ហា (Isha) បានធ្វើឱ្យចក្រភពអង់គ្លេសស្ថិតក្នុងការជាប់គាំង ខណៈដែលជើងហោះហើរ និងរថភ្លើងត្រូវបានលុបចោល មនុស្សរាប់ពាន់នាក់មិនមានថាមពលប្រើប្រាស់ និងការព្រមាន «គ្រោះថ្នាក់ដល់អាយុជីវិត» ត្រូវបានដាក់ចេញជាមួយនឹងហានិភ័យនៃព្យុះកួច។

ប្រតិបត្តិករផ្លូវដែករបស់ដែនដីស្កុតឡែន បានលុបចោលរថភ្លើង និងសេវាកម្មក្នុងម៉ោងប្រញាប់ប្រញាល់ទាំងអស់របស់ខ្លួន ហើយប្រហែលជាមិនចាប់ផ្តើមដំណើរការទេរហូតដល់ថ្ងៃច័ន្ទ។ អាកាសយានដ្ឋានឌុយប្លាំង (Dublin) បាននិយាយថាជើងហោះហើរចំនួន ១១៤ជើង ត្រូវបានលុបចោល។ ក្រុមហ៊ុនអាកាសចរណ៍ប្រ៊ីធធីស អ៊ែរវេស៍ (British Airways) បាននិយាយថាជើងហោះហើររបស់ខ្លួនជិត ៤០ជើង ត្រូវបានលុបចោលនៅទូទាំងចក្រភពអង់គ្លេស។

ការព្រមានអំពីអាកាសធាតុរបស់ការិយាល័យឧតុនិយមជាច្រើន រួមទាំងការជូនដំណឹងអំពីខ្យល់កន្រ្តាក់ចំនួនពីរករណី និងការព្រមានពណ៌ក្រហមដ៏កម្រសម្រាប់ផ្នែកខ្លះនៃភាគខាងជើងស្កុតឡែន ត្រូវបានដាក់ចេញ ខណៈដែលអង្គការស្រាវជ្រាវព្យុះកួច និងព្យុះធម្មតា (Torro) បាននិយាយថា ព្យុះកួចមួយគឺ «អាចកើតមាន» នៅក្នុងដែនដីអង់គ្លេស និងដែនដីវេលស៍ (Wales)។

ទីភ្នាក់ងារព្យាករណ៍មួយនេះបានព្រមានប្រជាជនឱ្យប្រុងប្រយ័ត្នចំពោះការខូចខាតលំនៅឋាន និងអគារ ការដួលរលំដើមឈើ ការដាច់ចរន្តអគ្គិសនី កំទេចកំទី រលកធំៗ និងទឹកជំនន់មួយចំនួន។ ភ្លៀងធ្លាក់ខ្លាំងបានវាយលុកកន្លែងខ្លះ ដោយមានការព្រមានអំពីទឹកជំនន់ចំនួន ២៦កន្លែងនៅក្នុងដែនដីអង់គ្លេស និង២៧កន្លែងនៅដែនដីស្កុតឡែន៕