ប្រជាជនមកពីតំបន់ហ្កាហ្សា ត្រូវបានព្យាបាលនៅក្នុងមន្ទីរពេទ្យចល័តមួយកន្លែងនៅលើនាវាកងទ័ពជើងទឹកបារាំង ខណៈស្ថាប័នវេជ្ជសាស្រ្តនៅក្នុងតំបន់ហ៊ុមព័ទ្ធត្រូវបានបំផ្លាញនៅក្នុងប្រតិបត្តិការយោធារបស់អ៊ីស្រាអែល។

នាវាវាយលុកទាំងលើគោក និងក្នុងទឹក របស់បារាំង ឈ្មោះ Dixmude បានចូលចតនៅកំពង់ផែប្រទេសអេហ្ស៊ីប ក្បែរតំបន់ហ្កាហ្សា ចាប់តាំងពីខែវិច្ឆិកា។ ប្រភពនានា រួមទាំងក្រសួងការពារជាតិបារាំង បាននិយាយថាពលរដ្ឋតំបន់ហ្កាហ្សា ប្រហែល ១.០០០នាក់ ត្រូវបានព្យាបាលនៅលើនាវា ដែលមានបុគ្គលិកពេទ្យជាង ៩០នាក់ មានបន្ទប់វះកាត់ចំនួនពីរ និងគ្រែប្រមាណ ៤០។

ពលរដ្ឋម្នាក់ ដែលរងរបួសជើងធ្ងន់ធ្ងរ បានសម្តែងការដឹងគុណដល់បុគ្គលិកពេទ្យដោយនិយាយថា គ្រូពេទ្យ បានដកយកចេញកម្ទេចអំបែងគ្រាប់ ហើយបានព្យាបាលការឆ្លងមេរោគ។

អង្គការសុខភាពពិភពលោក បាននិយាយថា មានតែមន្ទីរពេទ្យប្រហែល ១៦កន្លែងប៉ុណ្ណោះ ក្នុងចំណោម ៣៦កន្លែង នៅតំបន់ហ្កាហ្សា នៅដំណើរការតិចតួច ឬដោយផ្នែក ហើយត្រូវបានប្រមូលផ្តុំដោយអ្នកជំងឺនិងមនុស្សរាប់ពាន់នាក់ ដែលរត់គេចពីការប្រយុទ្ធគ្នា។