អ្នកនាំពាក្យរដ្ឋាភិបាលចាំផ្ទះប្រទេសអាហ្វហ្កានីស្ថាន លោក Zabihullah Mujahid បាននិយាយថា បំណែកយន្តហោះដឹកអ្នកដំណើររបស់រុស្ស៊ី ដែលបានធ្លាក់ក្នុងប្រទេសអាហ្វហ្គានីស្ថាន កាលពីថ្ងៃសៅរ៍ ត្រូវបានរកឃើញកាលពីថ្ងៃអាទិត្យ នៅក្នុងខេត្ត Badakhsan ដោយមានមនុស្ស ៤នាក់លើយន្តហោះ នៅរស់រានមានជីវិត។

យោងតាម លោក Mujahid បានឲ្យដឹងថា យន្តហោះដែលបានធ្លាក់នោះ ស្ថិតនៅក្នុងតំបន់ Aruz Koh នៃស្រុក Kof Ab ក្នុងខេត្ត Badakhshan ហើយអាកាសយានិក ស្ថិតក្នុងចំណោមអ្នករងរបួសទាំង៤នាក់។ លោក Mujahid និយាយថា ក្រុមស្វែងរករបស់រដ្ឋបាលប្រទេសអាហ្វហ្គានីស្ថាន បាននិងកំពុងបន្តកិច្ចខិតខំប្រឹងប្រែងរបស់ពួកគេ ដើម្បីស្វែងរក ថាតើនៅមានអ្នកផ្សេងទៀតនៅរស់រានមានជីវិតពីឧបទ្ទវហេតុនេះ ដែរឬទេ។

យន្តហោះដឹកអ្នកដំណើររបស់រុស្សីមួយគ្រឿង តាមសេចក្តីរាយការណ៍ថា មានមនុស្សជិះលើយន្តហោះចំនួន៦នាក់ រួមទាំងបុគ្គលិកយានិកចំនួន៤នាក់ និងអ្នកដំណើរ ២ នាក់ កំពុងធ្វើដំណើរទៅកាន់ទីក្រុងមូស្គូ ហើយបានបាត់ដានចេញពីអេក្រង់រ៉ាដា កាលពីល្ងាចថ្ងៃសៅរ៍ នៅក្នុងដែនអាកាសប្រទេស អាហ្វហ្គានីស្ថាន។