លោករដ្ឋមន្ត្រីការបរទេសអ៊ីស្រាអែល និងប៉ាឡេស្ទីននឹងជួបសមភាគីសហភាពអឺរ៉ុប (EU) របស់ពួកគេ នៅថ្ងៃពុធ (ទី២២ ខែមករា) នេះ ខណៈដែល EU ពិចារណាលើជំហានដ៏មានសក្តានុពលឆ្ពោះទៅរកសន្តិភាពដ៏ទូលំទូលាយ រវាងភាគីទាំង២ ទោះបីជាសង្រ្គាមនៅតំបន់ហ្កាហ្សាកំពុងបន្តមានក៏ដោយ។

លោក Israel Katz របស់អ៊ីស្រាអែល និងរដ្ឋមន្ត្រីការបរទេសប៉ាឡេស្ទីន លោក Riyad al-Maliki នឹងចូលរួមដោយឡែកពីគ្នា នៅក្នុងកិច្ចប្រជុំដែលតែងធ្វើជាទៀងទាត់របស់រដ្ឋមន្ត្រីការបរទេស EU នៅទីក្រុងប៊្រុចសែល ប្រទេសបែលហ្ស៊ិក ដែលភាគច្រើនផ្ដោតលើវិបត្តិនៅតំបន់មជ្ឈិមបូព៌ា ប៉ុន្តែក៏ពិចារណវាយតម្លៃពីសង្រ្គាមនៅអ៊ុយក្រែនផងដែរ។

រដ្ឋមន្ត្រីការបរទេសមកពីប្រទេសអារ៉ាប៊ីសាអ៊ូឌីត អេហ្ស៊ីប និងហ្ស៊កដានី ព្រមទាំងអគ្គលេខាធិការនៃសម្ព័ន្ធរដ្ឋអារ៉ាប់ក៏នឹងចូលរួមផងដែរ ខណៈដែលការជួបប្រជុំនេះផ្តោតទៅលើផលវិបាកនៃការវាយប្រហារកាលពីថ្ងៃទី៧ ខែតុលា លើអ៊ីស្រាអែលដោយក្រុមសកម្មប្រយុទ្ធហាម៉ាសប៉ាឡេស្ទីន និងការឆ្លើយតបយោធារបស់អ៊ីស្រាអែល។

នៅមុនពេលកិច្ចប្រជុំនេះ សេវាការទូតរបស់សហភាពអឺរ៉ុបបានផ្ញើឯកសារពិភាក្សាទៅកាន់ប្រទេសសមាជិកចំនួន២៧ របស់ខ្លួន ដោយលើឡើងពីផែនទីបង្ហាញផ្លូវឆ្ពោះទៅរកសន្តិភាព ក្នុងជម្លោះកាន់តែរីករាលដាលធំទៅៗ រវាងអ៊ីស្រាអែល និងប៉ាឡេស្ទីន។

ចំណុចស្នូលនៃផែនការនេះ គឺការអំពាវនាវឲ្យមាន «សន្និសីទសន្តិភាពត្រៀមទុកមុន» ដែលត្រូវបានរៀបចំឡើងដោយសហភាពអឺរ៉ុប អេហ្ស៊ីប ហ្ស៊កដានី អារ៉ាប៊ីសាអ៊ូឌីត និងសម្ព័ន្ធរដ្ឋអារ៉ាប់ ដោយសហរដ្ឋអាមេរិក និងអង្គការសហប្រជាជាតិ ក៏ត្រូវបានអញ្ជើញឲ្យធ្វើជាប្រធានកោះប្រជុំនៃកិច្ចប្រជុំនេះផងដែរ៕