កំពង់ឆ្នាំង៖ នៅព្រឹកថ្ងៃទី២២ ខែមករា នេះ កម្លាំងអធិការរដ្ឋបាលជលផលខាងត្បូងបឹងទន្លេសាប ដឹកនាំ ដោយលោក នូ រ៉េណូ, កម្លាំងខណ្ឌរដ្ឋបាលជលផល ដឹកនាំដោយលោក អ៊ូ សោភ័ណ្ឌ, កម្លាំងនគរបាល ប៉ុស្តិ៍រដ្ឋបាលកំពង់ព្រះគគីរ និងកម្លាំងសហគមន៍នេសាទ បានចុះរុះរើសម្រាស់ប្រមាណ៣០ដុំ ដែលគេ លួចដាក់នៅចំណុចព្រែកកោះរ៉ង ក្នុងតំបន់អភិរក្សឡូត៍ស្តីពាក់កន្ទេល ឃុំកំពង់ព្រះគគីរ ស្រុកបរិបូណ៌។

លោក ផាន់ ផល្លា ប្រធានសហគមន៍នេសាទកំពង់ព្រះគគីរ ដែលបានចូលរួមក្នុងយុទ្ធនាការនេះ បាននិយាយថា លោកមិនបានដឹងថា មានការលួចដាក់សម្រាស់ច្រើនបែបនេះទេ នៅចំណុចព្រែកកោះរ៉ង ព្រែកចុងតាគង់ ព្រែកថ្លាន់ និងចំណុច ព្រែកស្ទឹងពោធិ៍ ។ លោកប្តេជ្ញាមិនឱ្យកើតមានបញ្ហានេះទៀតទេ ។

លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានលើកឡើងថា ក្រោយទទួលបានព័ត៌មានអំពីការលួចដាក់សម្រាស់នៅចំណុចទាំង៤ ក្នុងតំបន់អភិរក្សនេះ លោកបាន បញ្ជាកម្លាំងរដ្ឋបាលជលផលឱ្យចុះកម្ទេចចោល ។ 

លោកបានព្រមានកម្លាំងសហគមន៍នេសាទកំពង់ព្រះគគីរ មិនត្រូវបណ្តែតបណ្តោយឱ្យកើតមាន បទល្មើសដូច្នេះទៀតឡើយ នៅក្នុងតំបន់អភិរក្សនេះ។

គួរបញ្ជាក់ថា នៅក្នុងតំបន់អភិរក្សឡូត៍ស្តីពាក់កន្ទេល បានកើតឡើងនូវបទល្មើសជាច្រើនប្រភេទ ដូចជាការដាក់សម្រាស់ ការប្រើឧបករណ៍ឆក់ត្រជាក់ ការប្រើចវ៉ (កូនជន) និងការកាប់បំផ្លាញព្រៃលិចទឹក ពីសំណាក់អ្នកធ្វើចម្ការនៅទីនោះ និងអ្នកដាក់សម្រាស់ ជាដើម ៕ ដោយ ៖ ហុងវាសនា