រដ្ឋមន្ត្រីការបរទេសអារ៉ាប៊ីសាអ៊ូឌីត បាននិយាយថា ព្រះរាជាណាចក្រនេះ នឹងមិនធ្វើប្រក្រតីទំនាក់ទំនង ជាមួយអ៊ីស្រាអែល ឬរួមចំណែកដល់ការកសាងឡើងវិញនូវតំបន់ហ្កាហ្សា ដោយគ្មានផ្លូវដែលអាចជឿទុកចិត្តបាន ទៅកាន់រដ្ឋប៉ាឡេស្ទីនឡើយ។

ការអធិប្បាយរបស់ព្រះអង្គម្ចាស់ ហ្វៃសាល ប៊ីន ហ្វាហាន ( Faisal bin Farhan) នៅក្នុងបទសម្ភាសន៍មួយជាមួយទូរទស្សន៍ CNN ដែលត្រូវបានចាក់ផ្សាយកាលពីយប់ថ្ងៃអាទិត្យ គឺជាពក្យសម្តីមួយចំនួនដែលមិនទាន់ចេញមកពីក្រុមមន្ត្រីអារ៉ាប៊ីសាអ៊ូឌីតដោយផ្ទាល់ទេ។ ការអធិប្បាយនោះ ធ្វើឲ្យពួកគេមានការខ្វែងគំនិតគ្នា ជាមួយនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) ដែលបានច្រានចោលភាពជារដ្ឋរបស់ប៉ាឡេស្ទីន និងបានពិពណ៌នាអំពីផែនការសម្រាប់ការគ្រប់គ្រងយោធាគ្មានដែនកំណត់លើតំបន់ហ្កាហ្សា។

ជម្លោះជុំវិញអនាគតរបស់តំបន់ហ្កាហ្សា កើតឡើងនៅពេលដែលសង្រ្គាមនៅតែផ្ទុះឡើងដោយគ្មានទីបញ្ចប់ បានជំរុញឲ្យសហរដ្ឋអាមេរិក និងសម្ព័ន្ធមិត្តអារ៉ាប់របស់ខ្លួន ប្រឆាំងនឹងអ៊ីស្រាអែលហើយបង្កជាឧបសគ្គធំដល់ផែនការសម្រាប់អភិបាលកិច្ច ក្រោយសង្គ្រាមឬការកសាងឡើងវិញនៅហ្កាហ្សា។

មុនពេលការវាយប្រហាររបស់ក្រុមហាម៉ាស នៅថ្ងៃទី៧ ខែតុលា ដែលបង្កឲ្យមានសង្រ្គាម សហរដ្ឋអាមេរិកបានកំពុងព្យាយាមធ្វើអន្តរាគមលើកិច្ចព្រមព្រៀងដ៏សំខាន់មួយ ដែលអារ៉ាប៊ីសាអ៊ូឌីត នឹងធ្វើប្រក្រតីភាព ទំនាក់ទំនងជាមួយអ៊ីស្រាអែល ជាថ្នូរនឹងការធានាសន្តិសុខរបស់សហរដ្ឋអាមេរិក ជំនួយក្នុងការបង្កើតកម្មវិធីនុយក្លេអ៊ែរស៊ីវិល នៅក្នុងព្រះរាជាណាចក្រនេះ និងដំណើរឆ្ពោះទៅរកការដោះស្រាយជម្លោះអ៊ីស្រាអែល និងប៉ាឡេស្ទីន។

កាលពីខែកញ្ញា លោកណេតាន់យ៉ាហ៊ូ ធ្លាប់បាននិយាយថា អ៊ីស្រាអែល «ស្ថិតនៅលើចំណុចមួយ»នៃកិច្ចព្រមព្រៀងបែបនេះ ដែលលោក បាននិយាយថា នឹងផ្លាស់ប្តូរតំបន់មជ្ឈិមបូព៌ា»។