ទីក្រុងប៉េកាំងរបស់ប្រទេសចិនបានកំណត់ទិសដៅកំណើនប្រហែល ៥ភាគរយ សម្រាប់ឆ្នាំ២០២៤ ដែលលើសពីគោលដៅកាលពីឆ្នាំមុន ដែលមានលើសពី ៤,៥ភាគរយ បើទោះបីជាមានការរំពឹងទុកពីការមានកំណើនយឺត សម្រាប់សេដ្ឋកិច្ចជាតិក៏ដោយ។

សេដ្ឋកិច្ចរបស់រដ្ឋធានីនេះបានឡើង ៥,២ភាគរយ នៅឆ្នាំ២០២៣ ដោយមានសមាមាត្រជាមួយសេដ្ឋកិច្ចជាតិដែលរហូតមកដល់ពេលនេះ បានបង្ហាញពីការមានកំណើនយឺតៗ ក្រោយជំងឺរាតត្បាត ចំពេលមានវិបត្តិអចលនទ្រព្យកាន់តែធ្ងន់ធ្ងរទៅៗ ការកើនឡើងនូវបំណុលរបស់រដ្ឋបាលក្នុងតំបន់ និងហានិភ័យបរិត្តផរណាដែលនៅបន្តមាន។

ជាមួយគ្នានេះ ទីក្រុងប៉េកាំងមានបំណងគ្រប់គ្រងអត្រាគ្មានការងារធ្វើនៅតាមទីក្រុងដែលផ្អែកលើការស្ទង់មតិរបស់ខ្លួនឲ្យនៅខាងក្រោម ៥ភាគរយ នាឆ្នាំនេះ។ កំណើនសេដ្ឋកិច្ចឆ្នាំ២០២៣ របស់ប្រទេសចិនដែលមានកម្រិតលើសបន្តិចពីគោលដៅប្រចាំឆ្នាំប្រហែល ៥ភាគរយនោះ ត្រូវបានជួយមួយផ្នែកដោយឥទ្ធិពលមូលដ្ឋានទាបកាលពីឆ្នាំមុន ក្នុងពេលមានការបិទខ្ទប់ទប់ស្កាត់ជំងឺកូវីដ-១៩។

បណ្ដាមេដឹកនាំបង្កើតគោលនយោបាយចិនបានបង្កើនទំនុកចិត្តក្នុងសេដ្ឋកិច្ច ជានឹងអាទិភាពគោលនយោបាយចម្បង ខណៈក្រុមហ៊ុន និងអ្នកប្រើប្រាស់មានការប្រុងប្រយ័ត្ន ចំពោះសុវត្ថិភាពការងារ កំណើនប្រាក់ចំណូល និងទីផ្សារលំនៅឋាន។

លោក Tommy Xie ប្រធានផ្នែកស្រាវជ្រាវ Greater China នៅធនាគារ OCBC Bank បាននិយាយថា គោលដៅកំណើនរបស់ទីក្រុងប៉េកាំង សម្រាប់ឆ្នាំ២០២៤ «អាចដើរតួជាកត្តានាំមុខ» ក្នុងការគាំទ្របន្ថែមទៀតដល់កំណើនសេដ្ឋកិច្ចជាតិ។ គេរំពឹងថា គោលដៅកំណើនរបស់ជាតិ នឹងត្រូវបានបង្ហាញ នៅឯការបើកកិច្ចប្រជុំសភាប្រចាំឆ្នាំ នៅខែមីនា៕