នគរបាលបាននិយាយកាលពីថ្ងៃចន្ទថា មនុស្សចំនួន ៧នាក់ត្រូវបានគេប្រទះឃើញថា ត្រូវបានបាញ់សម្លាប់នៅក្នុងផ្ទះចំនួនពីរនៅជាយក្រុង Joliet ក្នុងទីក្រុង Chicago នៃ រដ្ឋ Illinois ហើយបុរសម្នាក់កំពុងត្រូវបានក្រុមអ្នកស៊ើបអង្កេតតាមប្រមាញ់ ជាជនសង្ស័យពាក់ព័ន្ធការណីឃាតកម្មនេះ។ 

នគរបាលបាននិយាយថា ពួកគេពុំទាន់មានព័ត៌មានភ្លាមៗអំពីមូលហេតុដែលអាចឈានដល់ការបាញ់ប្រហារនោះទេ ប៉ុន្តែបាននិយាយថា ជនរងគ្រោះទាំងនោះ ត្រូវបានគេជឿថាជាសមាជិកនៃគ្រួសារតែមួយ។

ស្នងការនគរបាលក្រុង Joilet លោក William Evans បាននិយាយនៅក្នុងសន្និសីទសារព័ត៌មានមួយថា ក្រុមមន្ត្រី និងភ្នាក់ងាររបស់ស្នងការនគរបាលក្នុងតំបន់ សម្រាប់ក្រុមការងារពិសេសរបស់ FBI កំពុងជួយក្នុងការតាមប្រមាញ់ជនសង្ស័យ។

ជនសង្ស័យត្រូវបានស្នងការដ្ឋាននគរបាលក្រុង Joilet កំណត់អត្តសញ្ញាណ មានឈ្មោះថា Romeo Nance វ័យ២៣ ឆ្នាំ ដែល ក្រុមអាជ្ញាធរបាននិយាយថាគួរតែត្រូវបានចាត់ទុកថាជាជនប្រដាប់អាវុធ និងគ្រោះថ្នាក់៕