នៅព្រឹកថ្ងៃទី២៣ ខែមករា ឆ្នាំ២០២៤នេះ សមត្ថកិច្ច​ការិយាល័យ​ចរាចរណ៍​ជើង​គោក​រាជ​ធានី​ភ្នំពេញ បានបន្តធ្វើការបញ្ចូនខ្លួនបុរសជាអ្នកបើករថយន្ត Ford Ranger បង្កគ្រោះថ្នាក់ចរាចរណ៍ រហូត​ស្លាប់មនុស្ស០៤នាក់ និង០៤នាក់ផ្សេងទៀតរងរបួសធ្ងន់ស្រាល ទៅកាន់សាលា​ដំបូង​រាជ​ធានី​ភ្នំពេញ ជាថ្មីម្តងទៀត ដើម្បីបន្តសាកសួរនាំតាមនីតិវិធីច្បាប់ ។

ជនបង្កត្រូវបាននគរបាលបញ្ចូនខ្លួនទៅកាន់តុលាការតាំងពីវេលារសៀលថ្ងៃទី២២ ខែមករា ឆ្នាំ​២០២៤​ម្សិលមិញ ដោយការសាកសួរនាំត្រូវបានបញ្ចប់ តុលាការសម្រេច​បញ្ចូន​ខ្លួន​ទៅ​ផ្ញើរ​នៅ​នគរបាល​វិញ។ បច្ចុប្បន្ន រូបគេកំពុងស្ថិតក្រោមការសាកសួរនាំរបស់តុលាការ ដោយ​ពុំ​ទាន់​មាន​ការ​សម្រេច​យ៉ាងណានៅឡើយនោះទេ ។

ជនសង្ស័យមានឈ្មោះ នាង សំអូន ភេទប្រុស អាយុ៥៦ឆ្នាំ មុខរបរមន្ត្រីគយ មាន​ទីលំ​នៅ​ផ្ទះ​លេខ​40A ផ្លូវលេខ210 ភូមិ៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ ។ ជន​បង្ក​រូប​នេះ បានបើកបរក្នុងស្ថានភាពស្រវឹង ដោយមានជាតិអាត្រាជាតិអាកុល ០.៥៤ មី លី ក្រាម ក្នុង មួយលីត្រខ្យល់ ។

គួរំលឹកថា ករណីគ្រោះថ្នាក់ចរារណ៍ដ៏រន្ធត់ខាងលើនេះ បានកើតឡើងកាលពី១៨ និង​៤៥នាទី​យប់​ថ្ងៃទី​២០ ខែមករា ឆ្នាំ២០២៤ នៅចំណុចក្រោមស្ពានអាកាសឫស្សីកែវ តាម​បណ្តោយ​ផ្លូវ​ជាតិ​លេខ​៥ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។

ករណីនេះ ជនបង្កបានបើករថយន្តចុះពីស្ពានបេតុងខ្សែកាបឫស្សីកែវ ឆ្ពោះ​សំដៅ​ឡើ​ង​ទៅ​ផ្លូវ​ជាតិ​លេខ​០៥ លុះដល់ចំណុចស្តុប រថយន្តមិនបានបង្អង់ល្បឿន ក៏បានជ្រុលបុករះរថយន្ត និង​ម៉ូតូ​ជា​ច្រើន​គ្រឿង ដែលកំពុងឈប់ស្តុប បណ្តាលឱ្យមានមនុស្សរងរបួស និងស្លាប់ជាច្រើននាក់ នៅ​លើ​ដង​ផ្លូវ​តែម្តងទៅ ។ ហើយរថយន្ត និងម៉ូតូជាច្រើនគ្រឿងក៏ទទួលរងការខូចខាតផងដែរ៕ លីហេង