ភ្នំពេញ ៖ ក្រុមការងារគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបន្តចូលរួមយ៉ាងសកម្មក្នុងយុទ្ធនាការចុះចាក់វ៉ាក់សាំង ជូនប្រជាពលរដ្ឋនៅទូទាំងប្រទេស តាមការកំណត់របស់គណៈកម្មការចំពោះកិច្ចចាក់វ៉ាក់សាំងកូវីដ១៩ ក្របខ័ណ្ឌទូទាំងប្រទេស ដែលរហូតមកដល់ពេលនេះគឺបានជាងមួយសែននាក់ហើយ ចាប់តាំងពីខែមេសា កន្លងទៅនេះ។

ថ្លែងនៅក្នុងកិច្ចប្រជុំបូកសរុបវឌ្ឍនភាពការងារចាក់វ៉ាក់សាំងការពារជំងឺកូវីដ១៩ ជូនមន្ត្រីរាជការ ប្រជាពលរដ្ឋ កម្មករ កម្មការិនី នៅរាជធានីភ្នំពេញ និងខេត្តកណ្តាលឧត្តមសេនីយ៍ឯក ស ថាវី ជាប្រធានក្រុមគ្រូពេទ្យ បានលើកឡើងថា ក្រសួងសុខាភិបាល បានប្រគល់ភារកិច្ចជូនក្រុមការងារគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ ចាក់វ៉ាក់សាំងជូនមន្ត្រីរាជការ នៅតាមក្រសួង ស្ថាប័នដូចជា អាជ្ញាធរសវនកម្មជាតិ, គណៈកម្មាធិការជាតិរៀបចំការបោះឆ្នោត, ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច,អាកាសចរស៊ីវិល, អគ្គលេខាធិការដ្ឋាននៃគណៈកម្មាធិការជាតិរៀបចំបុណ្យជាតិ និងអន្តរជាតិ, អគ្គលេខាធិការដ្ឋានអចិន្ត្រៃយ៍ នៃអាជ្ញាធរជាតិទទួលបន្ទុកកិច្ចព្រំដែន, អគ្គលេខាធិការដ្ឋាន នៃគណៈកម្មាធិការជាតិប្រឆាំងភេរវកម្ម, គណៈកម្មាធិការសិទ្ធិមនុស្សកម្ពុជា, អង្គភាពព័ត៌មានប្រតិកម្មរហ័ស, អគ្គលេខាធិការដ្ឋាននៃវេទិកាសម្ព័ន្ធសង្គមស៊ីវិល, ក្រុមប្រឹក្សារំសាយកងកម្លាំងប្រដាប់អាវុធ, លេខាធិការដ្ឋាននៃអង្គភាពអ្នកនាំពាក្យរាជរដ្ឋាភិបាល និងបុគ្គលិកវិស័យឯកជន រួមមាន៖ ក្រុមហ៊ុនអាកាសចរនាន, ក្រុមរ៉ូយ៉ាល់គ្រុប និងសភាពាណិជ្ជកម្មកម្ពុជា, សេវាសុខាភិបាលឯកជននៅមណ្ឌលសណ្ឋាគារកាំបូឌីយ៉ាណា។

បើតាមឧត្តមសេនីយ៍ឯក ស ថាវី បានឱ្យដឹងថា គិតចាប់ពីថ្ងៃទី១ ខែមេសា ដល់ថ្ងៃទី១៧ ខែមិថុនា ឆ្នាំ២០២១ គ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ បានចាក់វ៉ាក់សាំងការពារជំងឺកូវីដ១៩ ជូនមន្ត្រីរាជការ បុគ្គលិកឯកវិស័យជន និងប្រជាពលរដ្ឋនៅរាជធានីភ្នំពេញ និងខេត្តកណ្តាល សម្រេចបានលទ្ធផលតាមការប្រគល់ភារកិច្ចរបស់គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេសរួមមាន៖ ដូសទី១ បានចំនួន១៩៩,៥០២ដូស និងដូសទី២ បានចំនួន ១៣០,៧៣៩ដូស។

ជាមួយគ្នានោះដែរ លោកឧត្តមសេនីយ៍ឯក ស ថាវី បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងយកអស់កម្លាំងកាយចិត្ត របស់ក្រុមគ្រូពេទ្យក្នុងការប្ដូរជីវិត លះបង់គ្រួសារ ដើម្បីពុះពារខិតខំក្នុងការព្យាបាលជំងឺដ៏កាចសាហាវ ដែលកំពុងតែ រាតត្បាត នៅលើពិភពលោកក៏ដូចជានៅប្រទេសកម្ពុជា៕អត្ថបទ ៖ ចក់