កងទ័ពអ៊ីស្រាអែល បាននិយាយនៅថ្ងៃអង្គារទី ២៣ ខែមករានេះថា ទាហាន ២៤ នាក់ ត្រូវបានសម្លាប់នៅហ្កាហ្សា ជាថ្ងៃមានចំនួនអ្នកស្លាប់ច្រើនបំផុតក្នុងរយៈពេលតែមួយថ្ងៃ ចាប់តាំងពីការចាប់ផ្តើមប្រតិបត្តិការតាមជើងគោក នៅថ្ងៃទី ២៧ ខែតុលា។ អ្នកនាំពាក្យយោធាលោក Daniel Hagari បាននិយាយនៅក្នុងសេចក្តីថ្លែងការណ៍តាមទូរទស្សន៍ថា ទាហានភាគច្រើន ត្រូវបានសម្លាប់នៅពេលការបាញ់គ្រាប់បែកជំរុញដោយរ៉ុក្កែតបាញ់ចំរថក្រោះមួយគ្រឿង និងអគារមួយខ្នង។

លោក Hagari បាននិយាយថា ទាហានជាច្រើននាក់ដែលត្រូវបានសម្លាប់គឺជាទាហានបម្រុង។ លោក និយាយថា យើងបានធ្វើការដើម្បីស្វែងរកជនរងគ្រោះរហូតដល់ម៉ោងចុងក្រោយ ដោយបង្ហាញពីការលំបាកក្នុងការទាញយកសាកសពដែលកប់នៅក្រោមគំនរបាក់បែក។

លោកនិយាយថា «ទាហានបម្រុងរបស់យើង បានលះបង់នូវអ្វីដែលគេស្រឡាញ់បំផុត ដើម្បីឲ្យយើងទាំងអស់គ្នារស់នៅទីនេះដោយសុវត្ថិភាពពេញលេញ»។

អ៊ីស្រាអែល បានចាប់ផ្តើមការវាយលុកយ៉ាងខ្លាំងក្លាទៅលើក្រុមសកម្មប្រយុទ្ធហាម៉ាសនៅតំបន់ហ្កាហ្សា បន្ទាប់ពីក្រុមប៉ាឡេស្ទីន បានវាយប្រហារអ៊ីស្រាអែលភាគខាងត្បូង កាលពីថ្ងៃទី ៧ ខែតុលា។

យោងតាមតួលេខរបស់សារព័ត៌មាន AFP ផ្អែកលើតួលេខផ្លូវការរបស់អ៊ីស្រាអែលបានឲ្យដឹងថា ការវាយប្រហារ បានសម្លាប់មនុស្សប្រហែល ១.១៤០ នាក់ ដែលភាគច្រើនជាជនស៊ីវិល ហើយយោងតាមក្រសួងសុខាភិបាលនៃដែនដីដែលគ្រប់គ្រងដោយក្រុមហាម៉ាស បានឲ្យដឹងថា ការវាយលុកសងសឹកយ៉ាងក្តៅគគុករបស់អ៊ីស្រាអែលលើក្រុមហាម៉ាស នៅតំបន់ហ្កាហ្សា បានសម្លាប់មនុស្ស ២៥.២៩៥ នាក់ ដែលភាគច្រើនជាស្ត្រី កុមារ និងមនុស្សវ័យជំទង់។