តុលាការកំពូលរបស់សហរដ្ឋអាមេរិក បានបោះឆ្នោត កាលថ្ងៃចន្ទ (ទី២២ ខែមករា) ដើម្បីអនុញ្ញាតឲ្យរដ្ឋបាលរបស់លោក Joe Biden ដករបងព្រំដែនលួសបន្លា ដែលរដ្ឋតិចសាស់បានសាងសង់ឡើង ដើម្បីទប់ទល់នឹងអន្តោប្រវេសន៍ខុសច្បាប់ពីប្រទេសម៉ិកស៊ិក ដែលជាបញ្ហាក្តៅគគុក នៅក្នុងការបោះឆ្នោតឆ្នាំនេះ។

របងទាំងនេះគឺជាគំនិតផ្តួចផ្តើមរបស់អភិបាលរដ្ឋតិចសាស់ លោក Greg Abbott ដែលជាអ្នកគាំទ្រយ៉ាងបើកចំហ ចំពោះអតីតប្រធានាធិបតីលោក Donald Trump ដែលកំពុងយកបញ្ហាអន្តោប្រវេសន៍ជាឧបករណ៍សំខាន់មួយក្នុងកិច្ចប្រឹងប្រែងរបស់លោក ដើម្បីដណ្តើមយកកៅអីសេតវិមានមកវិញ ក្នុងខែវិច្ឆិកា។

លោក Abbott បានចោទប្រកាន់ប្រធានាធិបតី លោក Biden ពី «ភាពអសកម្មដោយចេតនា» ខណៈដែលចំនួនខ្ពស់បំផុតនៃជនជាតិអាមេរិកកណ្តាល និងប្រជាជនដែលមានសញ្ជាតិផ្សេងទៀតបានឆ្លងកាត់ព្រំដែនសហរដ្ឋអាមេរិក-ម៉ិកស៊ិក ក្នុងរយៈពេលប៉ុន្មានខែថ្មីៗនេះ។

កាលខែធ្នូ ឆ្នាំ២០២៣ តុលាការឧទ្ធរណ៍សហព័ន្ធបានរារាំងរដ្ឋាភិបាលលោក Biden មិនឲ្យដករបងលួស ចេញពីច្រាំងទន្លេ Rio Grande នៅជិតទីក្រុង Eagle Pass លើកលែងតែក្នុងករណីមានអាសន្នផ្នែកវេជ្ជសាស្ត្រប៉ុណ្ណើ។ តែក្នុងខែមករានេះ ក្រសួងយុត្តិធម៌បានស្នើឲ្យតុលាការកំពូលលុបចោលដីកានេះ ក្នុងពាក្យសុំសង្គ្រោះបន្ទាន់ ខណៈដែលតុលាការពិចារណាអង្គសេចក្ដីពេញលេញនៃសំណុំរឿងនេះ។

តុលាការបានបោះឆ្នោត ៥ទល់នឹង៤ កាលពីថ្ងៃចន្ទ (ទី២២ ខែមករា) ដោយក្នុងនោះរួមទាំងការគាំទ្រពីប្រធានចៅក្រម លោក John Roberts ផងដែរ ដើម្បីគាំទ្ររដ្ឋបាលលោក Biden។ គ្មានភាគីណាផ្តល់ហេតុផល សម្រាប់ការបោះឆ្នោតរបស់ពួកគេទេ ដែលជារឿងធម្មតានៅពេលតុលាការសម្រេចលើញត្តិសង្គ្រោះបន្ទាន់៕