អ្នកគោរពបូជាសាសនារាប់ពាន់នាក់បានប្រមូលផ្តុំគ្នាកកកុញ នៅក្នុងប្រាសាទព្រះតាម (Ram Temple) ដែលទើបនឹងសម្ពោធឆ្លងថ្មីៗ នៅទីក្រុង Ayodhya ប្រទេសឥណ្ឌា នៅថ្ងៃអង្គារ (ទី២៣ ខែមករា) ជាថ្ងៃដំបូងដែលប្រាសាទនេះត្រូវបានបើកឲ្យចូលទស្សនាជាសាធារណៈ។

មនុស្សដ៏ណែនណាន់តាន់តាប់ត្រូវបានគេមើលឃើញថា កំពុងរុញគ្នាតាមច្រកចូលនៃប្រាសាទ ដោយប្រាថ្នាចង់ឃើញព្រះអាទិទេពរាម (Lord Ram) ដោយផ្ទាល់ភ្នែក ដែលត្រូវបានធ្វើពិធីឧទ្ទិសដោយនាយករដ្ឋមន្ត្រីលោក Narendra Modi ១ថ្ងៃមុននេះ តាមពិធីប្រពៃណីសាសនាហិណ្ឌូ។

ក្នុងពិធីសម្ពោធឆ្លង កាលពីថ្ងៃចន្ទនោះ គេឃើញថា មនុស្សជិត ៨.០០០នាក់ត្រូវបានអញ្ជើញឲ្យចូលរួម ខណៈដែលកម្លាំងនគរបាលជាង ១០.០០០នាក់ បានឈរយាមកាមទីក្រុង។ អ្នកគ្រប់គ្រងប្រាសាទរំពឹងថា នឹងមានភ្ញៀវទេសចរ ១០០.០០០នាក់ក្នុងមួយថ្ងៃ សម្រាប់រយៈពេល ២-៣ខែខាងមុខនេះ។

ព្រឹត្តិការណ៍នេះបានបង្កឲ្យមានភាពរីករាយខាងសាសនាយ៉ាងខ្លាំងក្លា នៅទូទាំងប្រទេសឥណ្ឌា ដោយរដ្ឋជាច្រើនបានប្រកាសឈប់សម្រាក កាលពីថ្ងៃចន្ទ ផ្សារហ៊ុនបានបិទ ហើយផ្ទះសម្បែង និងក្រុមហ៊ុន បានបំភ្លឺដោយភ្លើងពណ៌យ៉ាងព្រោងព្រាត បន្ទាប់ពីលោក Modi បានអំពាវនាវឲ្យចាត់ទុកពិធីនេះថា ជាពិធីបុណ្យឌីវ៉ាលី (Diwali) មួយទៀត ដោយឌីវ៉ាលីជាពិធីបុណ្យពន្លឺសាសនាហិណ្ឌូ។

យ៉ាងណាក្ដី ប្រាសាទនៅក្នុងទីក្រុង Ayodhya នេះ បានក្លាយជាបញ្ហាដ៏ចម្រូងចម្រាស ដែលបានជួយជំរុញឲ្យគណបក្សដែលកំពុងកាន់អំណាច គឺ Bharatiya Janta Party (BJP) ទទួលបានភាពល្បីល្បាញ និងឥទ្ធិពល ហើយដែលផ្តល់នូវការសន្យាអាយុកាល ៣៥ឆ្នាំរបស់ខ្លួន ដែលអ្នកវិភាគនិយាយថា គួរតែជួយដល់លោក Modi ខណៈដែលរូបលោកស្វែងរកអាណត្តិទី៣ ដ៏កម្រ ក្នុងការបោះឆ្នោត ដែលត្រូវបានកំណត់នៅខែឧសភា៕