ក្រសួងការបរទេសរុស្ស៊ីបានឲ្យដឹងថា រដ្ឋមន្ត្រីការបរទេសរុស្ស៊ីលោក Sergei Lavrov បានជួបជាមួយសមភាគីមកពីអ៊ីរ៉ង់ ទួរគី និងលីបង់ នៅមុនកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ នាថ្ងៃអង្គារ (ទី២៣ ខែមករា) ដែលគ្រោងពិភាក្សាអំពីបញ្ហាមជ្ឈិមបូព៌ា។

តាមរយៈកម្មវិធីផ្ញើសារ Telegram នាថ្ងៃអង្គារនេះ ក្រសួងបានឲ្យដឹងថា កិច្ចប្រជុំទ្វេភាគីផ្តោតលើតំបន់ហ្កាហ្សាស្ទ្រីប ស៊ីរី និង «ស្ថានភាពតានតឹង» នៅសមុទ្រក្រហម។ ជំនួបនេះបានធ្វើឡើងនៅទីក្រុងញូវយ៉កកាលពីថ្ងៃចន្ទ (ទី២២ ខែមករា)។

ក្រសួងបាននិយាយថា លោក Lavrov និងរដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បានព្រមព្រៀងគ្នាលើតម្រូវការ សម្រាប់បទឈប់បាញ់យ៉ាងឆាប់រហ័សនៅក្នុងតំបន់ហ្កាហ្សា និងលក្ខខណ្ឌសម្រាប់ការផ្តល់ជំនួយមនុស្សធម៌ដល់ជនស៊ីវិល។ ក្រសួងបានឲ្យដឹងថា «ការព្រួយបារម្ភជាទូទៅ ត្រូវបានលើកឡើងអំពីស្ថានភាពតានតឹង នៅសមុទ្រក្រហមដែលបានធ្លាក់ចុះយ៉ាងខ្លាំង»។

ជាមួយគ្នានេះក្រសួងបានបញ្ជាក់បន្ថែមថា លោក Lavrov និងរដ្ឋមន្ត្រីការបរទេសលីបង់ លោក Abdallah Bou Habib បាននិយាយអំពីសារៈសំខាន់នៃកិច្ចប្រឹងប្រែងរួមរបស់ប្រទេសនានា នៅក្នុងតំបន់ ឆ្ពោះទៅរកបទឈប់បាញ់ជាបន្ទាន់។ ហើយជាមួយសមភាគីទួរគី លោក Hakan Fidan លោក Lavrov ក៏បានពិភាក្សាអំពីបញ្ហាថាមពល ក៏ដូចជា «ទំនាក់ទំនងទ្វេភាគីនាពេលខាងមុខ» ផងដែរ៕