ឯកអគ្គរដ្ឋទូតអ៊ុយក្រែនប្រចាំនៅអង្គការសហប្រជាជាតិ(UN)លោក Sergiy Kyslytsya បាននិយាយមុនកិច្ចប្រជុំក្រុមប្រឹក្សាសន្តិសុខ UNដែលមានការចូលរួមផងដែរពីរដ្ឋមន្រ្តីការបរទេសរុស្ស៊ីលោក Sergei Lavrov ថា ទីក្រុងគីវ នឹងឈ្នះសង្រ្គាមជាមួយរុស្ស៊ីនៅឆ្នាំនេះ ។

អំឡុងពេលផ្តល់សេចក្តីថ្លែងការណ៍របស់គាត់ លោក Kyslytsya មានការចូលរួមផងដែរដោយក្រុមតំណាងរាប់សិបនាក់មកពី UN ។ លោកបានចាត់ទុកកិច្ចប្រជុំក្រុមប្រឹក្សាសន្តិសុខ UNដែលត្រូវបានស្នើសុំដោយរុស្ស៊ី ថាវាគ្រាន់តែជាការរំខានមួយប៉ុណ្ណោះ ។

លោក Kyslytsya និយាយថា ពួកយើងសូមបញ្ជាក់ពីការលាក់ពុតរបស់សហព័ន្ធរុស្ស៊ី ក្នុងការអំពាវនាវឲ្យមានជំនួបក្រុមប្រឹក្សាសន្តិសុខ UN មួយទៀត ដើម្បីរិះគន់ការផ្ទេរអាវុធខុសច្បាប់ដល់អ៊ុយក្រែន ដែលត្រូវបានធ្វើឡើង ដើម្បីគាំទ្រសិទ្ធិស្វ័យការពាររបស់អ៊ុយក្រែន ។

លោកថា សហព័ន្ធរុស្ស៊ី កំពុងសម្លាប់ពលរដ្ឋអ៊ុយក្រែនជាមួយអាវុធដែលផ្គត់ផ្គង់ពីប្រទេសដទៃ ។ ពួកយើងសូមធ្វើការថ្កោលទោសចំពោះការគាំទ្រយោធានៅតែបន្តសម្រាប់សង្រ្គាមរុស្ស៊ី ដែលរួមទាំងការគាំទ្រអាវុធពីអ៊ីរ៉ង់ បេឡារុស និងកូរ៉េខាងជើង ។

នៅពេលក្រុមអ្នកសារព័ត៌មានសួរថាតើអ៊ុយក្រែនអាចឈ្នះសង្រ្គាមដែរឬទេជាមួយរុស្ស៊ី លោក Kyslytsya បានឆ្លើយតបថា អ៊ុយក្រែននឹងឈ្នះសង្រ្គាមក្នុងឆ្នាំនេះ ប៉ុន្តែមិនមែនឈ្នះសម្រាប់តែអ៊ុយក្រែមួយប៉ុណ្ណោះទេ គឺឈ្នះសម្រាប់ពិភពប្រជាធិបតេយ្យទាំងអស់ ៕