ភ្នំពេញ ៖ អនុប្រធានប្រចាំការអាជ្ញាធរជាតិប្រយុទ្ធប្រឆាំងគ្រឿងញៀនឯកឧត្តម ព្រុំ សុខា ទេសរដ្ឋមន្ត្រី ស្នើដល់អន្តរក្រសួង និងមន្រ្តីពាក់ព័ន្ធទាំងអស់ ត្រូវបង្កើនសកម្មភាពតាមដាន និងស្រាវជ្រាវបន្ថែមទៀត ការនាំចូលសារធាតុគីមីផ្សំ និងការកែច្នៃផលិតសារធាតុញៀន ដើម្បីធានាសុវត្ថិភាព និងបង្ការទប់ស្កាត់ការប្រើប្រាស់សារធាតុគីមីផ្សំខុសច្បាប់ និងការលួចបង្វែរពីជំនួញស្របច្បាប់យកទៅផលិតគ្រឿងញៀនខុសច្បាប់។

 នៅក្នុងកិច្ចប្រជុំពេញអង្គដើម្បីពិនិត្យ និងពិភាក្សាលើសេចក្តីព្រាងរបាយការណ៍ស្តីពីលទ្ធផលការងារត្រួតពិនិត្យគ្រឿងញៀនឆ្នាំ២០២៣ និងលើកទិសដៅ ឆ្នាំ២០២៤ នាព្រឹកថ្ងៃទី២៣ ខែមករា ឆ្នាំ២០២៤នេះ នៅទីស្ដីការគណៈរដ្ឋមន្រ្តី ឯកឧត្តមទេសរដ្ឋមន្ត្រី ព្រុំ សុខា បានគូសបញ្ជាក់ថា គោលដៅដែលត្រូវបង្កើនការត្រួតពិនិត្យការចែកចាយ ការប្រើប្រាស់ និងការរក្សាទុកសារធាតុញៀន សារធាតុគីមីផ្សំ និងសារធាតុគីមីពាក់ព័ន្ធនឹងការផលិតគ្រឿងញៀនខុសច្បាប់នោះ គឺនៅតាមបណ្តាក្រុមហ៊ុន រោងចក្រ សហគ្រាស និងនៅទីកន្លែងរផ្សេងទៀត ដែលសង្ស័យមានការចែកចាយ និងការប្រើប្រាស់សារធាតុញៀន សារធាតុគីមីផ្សំ និងសារធាតុគីមីពាក់ព័ន្ធនឹងការផលិតគ្រឿងញៀនខុសច្បាប់។

ឯកឧត្តមទេសរដ្ឋមន្ត្រី ក៏បានស្នើដល់ក្រុមការងារអន្ដរក្រសួងពាក់ព័ន្ធទាំងអស់ ត្រូវប្រមូលព័ត៌មានពាក់ព័ន្ធការនាំចូល នាំចេញ ដឹកជញ្ជូន រក្សាទុក ជួញដូរ ប្រើប្រាស់ និងសន្និធិសារធាតុ ដែលបានប្រើប្រាស់នៅក្នុងវិស័យដូចមានចែងក្នុងប្រការ២ នៃសេចក្ដីសម្រេចនេះ ដើម្បីចាត់វិធានការគ្រប់គ្រងនិងត្រួតពិនិត្យការនាំចេញ នាំចូល ការដឹកជញ្ជូន ការរក្សាទុក ការជួញដូរ ការប្រើប្រាស់ និងការធ្វើសន្និធិសារធាតុញៀន សារធាតុគីមីផ្សំ និងសារធាតុគីមីពាក់ព័ន្ធនឹងការផលិតគ្រឿងញៀនខុសច្បាប់ ដើម្បីធានាសុវត្ថិភាព និងបង្ការទប់ស្កាត់ការប្រើប្រាស់ខុសច្បាប់ និងការលួចបង្វែរពីជំនួញស្របច្បាប់យកទៅផលិត គ្រឿងញៀនខុសច្បាប់ជាដើម។

បើតាមនាយឧត្តមសេនីយ៍ មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិ បានបញ្ជាក់ឲ្យដឹងថា ផ្អែកតាមលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ចំនួន៨លើកកន្លងទៅ (២០១៧-២០២៣) កងកម្លាំងអនុវត្តច្បាប់បានបើកប្រតិបត្តិការបង្ក្រាបបទល្មើសគ្រឿងញៀនសរុបចំនួន៥៥,៣០៥ករណី ឃាត់ខ្លួនជនសង្ស័យ ១២០,៣០៧នាក់ ចាប់យកសារធាតុញៀនគ្រប់ប្រភេទទម្ងន់ប្រមាណ២៧,៦៤១គីឡូក្រាមនិងសារធាតុគីមីផ្សំប្រមាណ៥២០,០០៥គីឡូក្រាមរួមទាំងមធ្យោបាយ សម្ភារៈនិង វត្ថុតាងជាច្រើនទៀត។

ឯកឧត្តមអគ្គលេខាធិការបានបញ្ជាក់បន្ថែមថាក្នុងនោះសមត្ថកិច្ចបានស្រាវជ្រាវ បានរកឃើញ និងបានបង្ក្រាបបទល្មើសគ្រឿងញៀន ដែលមានអង្គការចាត់តាំងចំនួន៤៣៥ករណី ឃាត់ខ្លួនមេក្លោង១៦៤នាក់ និងខ្សែរយៈបណ្តាញ៨១១នាក់ ហើយបានកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់៕ អត្ថបទ ៖ បាន ចក់