កម្មវិធីស្បៀងអាហារពិភពលោក (WFP) នៅថ្ងៃអង្គារ (ទី២៣ ខែមករា) នេះ បាននិយាយថា មានជំនួយស្បៀងអាហារដ៏តិចតួចប៉ុណ្ណោះ ដែលត្រូវបានផ្ដល់ឲ្យហួសពីភាគខាងត្បូងនៃតំបន់ហ្កាហ្សា ចាប់តាំងពីជម្លោះចាប់ផ្ដើមផ្ទុះឡើង ហើយថា ហានិភ័យនៃការការកើតតំបន់ទុរ្ភិក្ស នៅក្នុងដែនដីប៉ាឡេស្ទីន នៅតែមានដដែល។

ការវាយលុករបស់អ៊ីស្រាអែលដែលបានធ្វើឡើងបន្ទាប់ពីមានការវាយប្រហារយ៉ាងកំរោលដ៏ឃោរឃៅរបស់ពួកសកម្មប្រយុទ្ធហាម៉ាស នៅភាគខាងត្បូងអ៊ីស្រាអែលកាលពីថ្ងៃទី៧ ខែតុលា បានធ្វើឲ្យមានការផ្លាស់ទីលំនៅដោយភាគច្រើននៃប្រជាជន ២,៣លាននាក់ នៅហ្កាហ្សា ហើយបណ្តាលឲ្យមានការខ្វះខាតស្បៀងអាហារ ទឹក និងការផ្គត់ផ្គង់វេជ្ជសាស្ត្រយ៉ាងធ្ងន់ធ្ងរ។

យោងតាមអាជ្ញាធរប៉ាឡេស្ទីន យ៉ាងហោចណាស់មនុស្ស ២៥.២៩៥នាក់ នៅហ្កាហ្សា ត្រូវបានសម្លាប់ ស្របពេលមានការភ័យខ្លាចថា រាប់ពាន់នាក់ទៀតត្រូវបានកប់នៅក្រោមគំនរបាក់បែកនៃតំបន់ឆ្នេរសមុទ្រដែលរងការបំផ្លិចបំផ្លាញដោយភាគច្រើន។

លោកស្រី Abeer Etefa អ្នកនាំពាក្យ WFP ប្រចាំតំបន់មជ្ឈិមបូព៌ា បាននិយាយថា៖ «មានការពិបាកណាស់ក្នុងការចូលទៅកាន់កន្លែងដែលយើងត្រូវទៅឲ្យដល់ក្នុងតំបន់ហ្កាហ្សា ជាពិសេសនៅភាគខាងជើងនៃតំបន់ហ្កាហ្សា។ មានជំនួយតិចតួចណាស់ ដែលអាចផ្ដល់ឲ្យហួសពីភាគខាងត្បូងនៃតំបន់ហ្កាហ្សាស្ទ្រីប។ ហើយខ្ញុំគិតថា ហានិភ័យនៃការកើតមានតំបន់ទុរ្ភិក្ស ក្នុងតំបន់ហ្កាហ្សា នៅតែមានច្រើនណាស់»។

សូមបញ្ជាក់ថា ចាប់តាំងពីការចាប់ផ្តើមនៃអរិភាព ការផ្តល់ជំនួយទៅកាន់ភាគខាងជើងតំបន់ហ្កាហ្សា ត្រូវបានរឹតបន្តឹង ហើយតំបន់នេះត្រូវបានកាត់ផ្តាច់ទាំងស្រុងពីជំនួយពីខាងក្រៅ អស់រយៈពេលជាច្រើនសប្ដាហ៍ នៅក្នុងជម្លោះនេះ៕