នាយករដ្ឋមន្ត្រីហុងគ្រី លោក Viktor Orban នៅថ្ងៃអង្គារ (ទី២៣ ខែមករា) នេះ បាននិយាយថា លោកបានអញ្ជើញសមភាគីស៊ុយអែតរបស់លោកឲ្យមកបំពេញទស្សនកិច្ច និងពិភាក្សាពីប្រទេសរបស់លោក ក្នុងការចូលរួមជាមួយសម្ព័ន្ធភាពយោធាណាតូ (NATO) ជាដំណើរការដែលប្រទេសហុងគ្រី និងទួរគី បានពន្យារពេល។

នៅពេលសួរអំពីការអញ្ជើញនេះ អ្នកនាំពាក្យរបស់នាយករដ្ឋមន្ត្រីស៊ុយអែត លោក Ulf Kristersson បានឲ្យដឹងនៅក្នុងអត្ថបទមួយទៅកាន់សារព័ត៌មាន Reuters ថា ទីក្រុង Stockholm មិនទាន់សម្រេចចិត្តថា តើត្រូវឆ្លើយតបយ៉ាងណានោះទេ។

នៅលើវេទិកាបណ្ដាញសង្គម X លោក Orban បានប្រាប់ថា៖ «ថ្ងៃនេះខ្ញុំបានផ្ញើលិខិតអញ្ជើញទៅកាន់នាយករដ្ឋមន្រ្តីស៊ុយអែតលោក Ulf Kristersson សម្រាប់ដំណើរទស្សនកិច្ចទៅកាន់ប្រទេសហុងគ្រី ដើម្បីពិភាក្សា ជុំវិញការចូលជាសមាជិកអង្គការណាតូរបស់ប្រទេសស៊ុយអែត»។ 

តែយ៉ាងណាក្ដី គ្មានកាលបរិច្ឆេទជាក់លាក់ណាមួយ ត្រូវបានស្នើឡើង សម្រាប់ដំណើរទស្សនកិច្ចនេះទេ។ រដ្ឋមន្ត្រីការបរទេសហុងគ្រី លោក Peter Szijjarto បានប្រាប់អ្នកយកព័ត៌មាន នៅថ្ងៃអង្គារនេះថា គោលបំណងនៃដំណើរទស្សនកិច្ចនេះ គឺ «ដើម្បីកសាងទំនុកចិត្ត»។

សូមបញ្ជាក់ថា ប្រទេសស៊ុយអែតបានដាក់ពាក្យសុំចូលជាសមាជិកអង្គការណាតូ ក្នុងខែឧសភា ឆ្នាំ២០២២ ដោយការផ្លាស់ប្តូរជាប្រវត្តិសាស្ត្រនៅក្នុងគោលនយោបាយសន្តិសុខរបស់ខ្លួន ដែលត្រូវបានជំរុញដោយការលុកលុយរបស់រុស្ស៊ីលើអ៊ុយក្រែន ក្នុងខែកុម្ភៈនាឆ្នាំនោះ។ ប៉ុន្តែទាំងប្រទេសទួរគី និងហុងគ្រីបានជំទាស់ដោយបានពន្យារពេលដល់ដំណើរការដែលទាមទារឲ្យមានឯកភាព ក្នុងចំណោមប្រទេសជាសមាជិករបស់អង្គការណាតូ៕