លោក Donald J. Trump បានយកឈ្នះលើលោកស្រី នីគីហាលី(Nikki Haley) នៅក្នុង​ការ​បោះឆ្នោត​បឋមនៅរដ្ឋ New Hampshire កាលពីថ្ងៃអង្គារ ដោយបន្ត​សន្ទុះ​រប​ស់លោ​ក​ឆ្ពោះ​ទៅ​រកការ​តែង​តាំង​ជាបេក្ខភាពប្រធានាធិបតីពីគណបក្សសាធារណរដ្ឋ និងបានលើកឡើងនូវ​សំណួរ​ថ្មីៗ​អំពី​លទ្ធភាពជោគជ័យរបស់លោកស្រីនៅពេលខាងមុខ។

ជ័យជម្នះ​របស់លោក Trump ដែលត្រូវបានហៅដោយសារព័ត៌មាន AP នៅពេលការិយាល័យ​បោះឆ្នោត​ចុង​ក្រោយបានបិទនៅម៉ោង ៨ យប់ ដែលមានន័យថា លោកបានទម្លាក់លោក Ron DeSantis ក្នុងរដ្ឋ Iowa និងលោកស្រី Haley ក្នុងរដ្ឋ New Hampshire ជារដ្ឋពីរដែលពួកគេ​បាន​ធ្វើ​យុទ្ធនាការ និងចំណាយពេលច្រើនបំផុត។ គ្មានបេក្ខជន​មកពី​គណបក្ស​សាធារណរដ្ឋ​ណាម្នាក់​ធ្លាប់​បាន​ឈ្នះក្នុងរដ្ឋចំនួនពីរដំបូងឡើយ ហើយ​បន្ទាប់មកមិនបាន​ទទួល​ការ​តែងតាំង​ជា​បេក្ខភាព​ប្រធានាធិបតីឡើយនៅទីបំផុតនោះទេ។  

លោកស្រី Haley បានទទួលស្គាល់បរាជ័យរបស់លោកស្រី ហើយបានអបអរសាទរចំពោះលោក Trump ប៉ុន្តែបានប្តេជ្ញាថានឹងបន្តយុទ្ធនាការរបស់របស់លោកស្រីទៅកាន់រដ្ឋ South Carolina ជារដ្ឋកំណើតរបស់លោកស្រី ដែលនឹងរៀបចំការបោះឆ្នោតបឋមនៅថ្ងៃទី ២៤ ខែកុម្ភៈ។ 

លោក​ស្រីបា​នប្រាប់ក្រុមអ្នកគាំទ្រនៅ Concord, N.H. ថា រដ្ឋ New Hampshire គឺជារដ្ឋដំបូង​គេ​នៅ​ក្នុង​ប្រទេសនេះ មិនមែនជារដ្ឋចុងក្រោយនៅក្នុងប្រទេសនោះទេ។ ការប្រណាំង​ប្រជែងនេះគឺ​នៅ​វែង​ឆ្ងាយទៀត។ នៅសល់រដ្ឋរាប់សិបទៀតដែលត្រូវទៅ។ ហើយកន្លែងបន្ទាប់គឺរដ្ឋ South Carolina ដ៏ផ្អែមល្ហែមរបស់លោកស្រី។

លោកស្រីបានស្តីបន្ទោសលោក Trump ចំពោះការបរាជ័យ​របស់​គណបក្ស​សាធារណរដ្ឋ​នៅ​ក្នុង​ការ​បោះឆ្នោតកាលពីឆ្នាំ២០១៨ ហើយបានព្រមានថាសំណុំរឿងតុលាការរបស់លោក ភាព​ចម្រូង​ចម្រាស និងភាពចលាចលដែលមិនអាចបំភ្លេចបាន នឹងធ្វើឱ្យប៉ះពាល់​ដល់​យុទ្ធនាការ​របស់​លោក​។

លោកស្រីបាននិយាយថា លោកស្រីនឹងយកឈ្នះលោកប្រធានាធិបតី Biden ហើយលោក Trump នឹងចាញ់ និងបើកផ្លូវអាណត្តិទីពីរសម្រាប់ប្រធានាធិបតីកំពុងកាន់តំណែង និង​អនុ​ប្រធានា​ធិបតីលោកស្រី Kamala Harris ៕