យុវជនអាស៊ានទាំង១០រូប បានបន្តដំណើរ ទៅទស្សនកិច្ចនៅសហគមន៍នេសាទត្រពាំងសង្កែ ដែលស្ថិតនៅខេត្តកំពត។ ការទៅទស្សនកិច្ចនេះ គឺដើម្បីសិក្សាស្វែងយល់ពី កិច្ចការ​នៅ​សហគម​ន៍​នេសាទ បង្រៀនកុមារក្នុងសហគមន៍ឱ្យចេះពីការការពារពីគ្រោះហានិភ័យនានា ក៏ដូចជា​ចូល​រៀន​ដាំ​ដើម​កោងកាង ក្នុងតំបន់នោះផងដែរ។

យុវជនអាស៊ានទាំង ១០ រូប តំណាងឱ្យប្រទេសសមាជិកអាស៊ានទាំង ១០ បាន​បន្ត​ទស្សន​កិច្ច​របស់​ខ្លួន ជាច្រើនកន្លែងទាំងនៅរាជធានីភ្នំពេញ ក៏ដូចជានៅតាមបណ្ដាខេត្តមួយចំនួន ក្នុងរយៈ​ពេល​ជាង ២០ថ្ងៃដែលពួកគេស្នាក់នៅកម្ពុជា។ ជាក់ស្ដែងនៅថ្ងៃទី ២៣ និងថ្ងៃទី ២៤ ខែមករា នេះ ពួកគេកំពុងស្នាក់នៅនិងសិក្សាស្វែងយល់ ក៏ដូចជាចូលរួមការងារសង្គមនៅ តំបន់​សហគមន៍​នេសាទ ត្រពាំងសង្កែ ដែលស្ថិតនៅស្រុកទឹកឈូ ខេត្តកំពត។

ក្នុងការ​បំពេញទស្សនកិច្ចនៅសហគមន៍នេសាទត្រពាំងសង្កែនេះ យុវជនអាស៊ាន​បាន​ជួប​ជាមួយ​ស្ថាបនិក​សហគមន៍។ ជំនួបនេះគឺដើម្បីសិក្សាស្វែងយល់ពី ការបង្កើតឱ្យមាន​សហគមន៍​នេសាទ​ត្រពាំង​សង្កែ ទស្សនវិស័យ គោលបំណង ក៏ដូចជាការវិវត្តរបស់សហគមន៍ ក្រោយពីការ​បង្កើត​មក​ទល់​បច្ចុប្បន្ន​។ ក្នុងជំនួបដដែលនេះ យុវជនអាស៊ានក៏បានសិក្សាស្វែងយល់ពី ការបណ្ដុះ ការ​ដាំដុះ និងសារៈសំខាន់នៃដើមកោងកាងផងដែរ។

ក្រៅពីការ​ជួបជាមួយស្ថាបនិកនៃសហគមន៍ ក្រុមយុវជននិងវត្តមានរបស់មន្ត្រីក្រសួងអប់រំ ក៏​បាន​ជួយ​រៀប​ចំ​បណ្ណាល័យរបស់សហគមន៍ ក៏ដូចជាផ្ដល់ជូនសៀវភៅរឿងប្រមាណ ១០០ ក្បាល​ជូន​ទៅ​បណ្ណា​ល័យផងដែរ។ លើសពីនេះទៅទៀត យុវជនអាស៊ានទាំង ១០ប្រទេស ក៏បាន​ជួប​ជាមួយ​កុមារ​ក្នុងសហគមន៍ ដើម្បីចែករំលែកពីវិធានសុវត្ថិភាព ក៏ដូចជាគុណ​សម្បត្តិ​នៃ​ការ​អាន​សៀវភៅ ក្នុងគោលបំណងបណ្ដុះការអានរបស់កុមារ។ ក្រោយពីសកម្មភាពមួយនេះ ក្រុម​យុវជន​អាស៊ាន​ក៏​បានចូលរួមដាំ ដើមកោងកាងដោយផ្ទាល់ នៅទីតាំងដែលរងផលប៉ះពាល់។

សម្រាប់​យុវជនអាស៊ានអាស៊ានក្រោយបញ្ចប់ទស្សនកិច្ចសិក្សាស្វែងយលនៅ សហគមន៍​នេសាទ​ត្រពាំង​ស្កែ ពួកគេ នឹងបន្តទៅទស្សនកិច្ច និងបំពេញសកម្មភាពមួយចំនួនទៀត នៅឆ្នេរកែប ទើប​ត្រឡប់​ចូល​រាជធានីភ្នំពេញវិញ។ ការវិលត្រឡបចូលរាជធានីភ្នំពេញវិញ ពួកគេ​នឹង​ទៅ​ទស្សនា​នៅ​ព្រះបរមរាជវាំង សារមន្ទីជាតិ រមណីយដ្ឋានប្រវត្តិសាស្ត្រវត្តភ្នំ ទស្សនកិច្ចនៅវិមានឈ្នះឈ្នះ ក៏​ដូច​ជា​ពហុកីឡដ្ឋានមរតកតេជោផងដែរ៕ អត្ថបទ៖ គឹម ហុក