ប្រជាជនអូស្ត្រាលីក្នុងរដ្ឋ ឃ្វីនស៍ឡែន (Queensland) កំពុងមមាញឹករៀបចំថង់ខ្សាច់នៅថ្ងៃពុធ (២៤ មករា) នេះ ខណៈដែលពួកគេត្រៀមទប់ទល់នឹងព្យុះត្រូពិចកម្រិតទាប ដែលជាប្រព័ន្ធអាកាសធាតុសម្ពាធទាប កំពុងអភិវឌ្ឍទៅជាព្យុះស៊ីក្លូនត្រូពិច ឃឺរីលី (Kirrily) នៅពេលល្ងាច។

ក្រុមអាជ្ញាធរបានបន្ទាបកម្រិតព្យុះនៃប្រព័ន្ធអាកាសធាតុនេះទៅជាប្រភេទទី២ ពីប្រភេទទី៣ ដែលបានប្រកាសកាលពីមុន។

អ្នកស្រុកមកពីទីក្រុង ថោនស៍វីល (Townsville) និងទីក្រុង មែកខាយ (Mackay) កំពុងបំពេញបាវខ្សាច់ដើម្បីការពារទ្រព្យសម្បត្តិរបស់ពួកគេពីការខូចខាតដោយទឹកជំនន់ ខណៈអ្នកស្រុកក្នុងទីក្រុង ប្រ៊ីសបេន (Brisbane) ត្រូវបានព្រមានថាភ្លៀងធ្លាក់ខ្លាំងនឹងវាយប្រហារតំបន់នេះ ដែលបង្កើនហានិភ័យនៃទឹកជំនន់ដ៏គំហុក។

កាលពីដើមខែធ្នូ ព្យុះស៊ីក្លូន ចាស្ពើ (Jasper) បានបង្កការបំផ្លិចបំផ្លាញនៅតំបន់ភាគខាងជើងនៃរដ្ឋ ឃ្វីនស៍ឡែន នេះដោយបង្ខំឱ្យអ្នកស្រុកមួយចំនួនភៀសខ្លួនចេញពីផ្ទះសម្បែង និងជន់លិចទីក្រុងជាច្រើន៕