រដ្ឋមន្រ្តីការពារជាតិរបស់ទីក្រុងម៉ានីល បាននិយាយថា កងកម្លាំងប្រដាប់អាវុធហ្វីលីពីន នឹងធានានូវការរុករក និងប្រើប្រាស់ធនធានធម្មជាតិដោយ «គ្មានការរារាំង និងដោយសន្តិភាព» នៅក្នុងតំបន់សេដ្ឋកិច្ចផ្តាច់មុខ (EEZ) របស់ប្រទេស ខណៈដែលខ្លួនផ្លាស់ប្តូរការយកចិត្តទុកដាក់លើការការពារពីខាងក្រៅ។

រដ្ឋមន្ត្រីក្រសួងការពារជាតិ លោក ហ្គីលប៊ឺតតូ តេអូដូរ៉ូ (Gilberto Teodoro) បានប្រាប់ក្លឹបសារព័ត៌មានម៉ានីល MOPC កាលពីយប់ថ្ងៃអង្គារ (២៣ មករា) ថា «ហ្វីលីពីនកំពុងវិវត្តទៅជាគំនិតការពារជាតិ ដែលគិតគូរពីអំណាចរបស់យើងទៅក្នុងផ្នែកដែលត្រូវអនុវត្ត ដោយរដ្ឋធម្មនុញ្ញ និងកាតព្វកិច្ច ការពារ និងថែរក្សាធនធានរបស់យើង»។

លោក តេអូដូរ៉ូ ក៏បាននិយាយផងដែរថា ប្រទេសហ្វីលីពីននឹង «បង្កើនសកម្មភាព» ជាមួយសម្ព័ន្ធមិត្ត និងដៃគូសំខាន់ៗនៅក្នុងសមុទ្រហ្វីលីពីនខាងលិច និងផ្នែកផ្សេងទៀតនៃប្រទេស ហើយ «អនុវត្តភាពជាដៃគូទាំងនេះឱ្យបានពេញលេញ»។

ទីក្រុងម៉ានីល បានហៅផ្នែកនៃសមុទ្រចិនខាងត្បូងដែលស្ថិតនៅក្នុងតំបន់សេដ្ឋកិច្ចផ្តាច់មុខ EEZ របស់ខ្លួនថាជាសមុទ្រហ្វីលីពីនខាងលិច ជាទីដែលមានការប្រឈមមុខដាក់គ្នាជាបន្តបន្ទាប់ជាមួយប្រទេសចិនជាមួយនឹងការចោទប្រកាន់ដាក់គ្នាទៅវិញទៅមកនៃការបង្កជម្លោះ៕