ទីភ្នាក់ងារចារកម្ម GCHQ របស់ចក្រភពអង់គ្លេស នៅថ្ងៃពុធ (ទី២៤ ខែមករា) នេះ បានព្រមានថា ការរីកចម្រើនយ៉ាងឆាប់រហ័សនៃឧបករណ៍បញ្ញាសិប្បនិម្មិត (AI) ថ្មី នឹងនាំទៅរកការកើនឡើងនៃការវាយប្រហារតាមប្រព័ន្ធអ៊ីនធឺណិត ហើយនិងកាន់តែធ្វើឲ្យងាយស្រួលសម្រាប់ពួកលួចចូលមើលទិន្នន័យព័ត៌មានវិទ្យាដែលមិនសូវមានបទពិសោធន៍ចូលទៅបំផ្លាញប្រព័ន្ធឌីជីថល។

មជ្ឈមណ្ឌលសន្តិសុខអ៊ីនធឺណិតជាតិ (NCSC) ដែលជាផ្នែកមួយនៃ GCHQ បានឲ្យដឹងនៅក្នុងរបាយការណ៍មួយថា ភាពងាយស្រួលនោះក៏ទំនងជានឹងរួមចំណែកដល់ការកើនឡើងជាសកលនៃការវាយប្រហារពីមេរោគ ដែលឧក្រិដ្ឋជនលួចបំប្លែងកូដប្រព័ន្ធកុំព្យូទ័រ ដើម្បីទទួលបានប្រាក់លោះប្រព័ន្ធឌីជីថល។

របាយការណ៍ បានឲ្យដឹងថា៖ «AI ពិតជានឹងបង្កើនបរិមាណ និងបង្កើនឥទ្ធិពលនៃការវាយប្រហារតាមអ៊ីនធឺណិត ក្នុងរយៈពេល ២ឆ្នាំខាងមុខ។ តែផលប៉ះពាល់លើការគំរាមកំហែងតាមអ៊ីនធឺណិត នឹងមានកម្រិតមិនស្មើគ្នានោះទេ»។

ទីភ្នាក់ងារស៊ើបការណ៍សម្ងាត់ទូទាំងពិភពលោក កំពុងប្រឈមនឹងការកើនឡើងនៃបញ្ហាសុវត្ថិភាពដែលអាចកើតមាន ទាក់ទងនឹងវិធីដោះស្រាយដែលអាចបង្កើតអន្តរកម្មសំឡេងរបស់មនុស្ស ដែលហៅថា គំរូភាសាធំ ឬ LLMs ដូចជាកម្មវិធីបច្ចេកវិទ្យា ChatGPT របស់ក្រុមហ៊ុន OpenAI ដែលក្រុមហ៊ុននានាកំពុងបញ្ចូលទៅក្នុងសេវាកម្មជាច្រើន ក្នុងនោះរួមទាំងការលក់ និងការថែទាំអតិថិជនផងដែរ។

ផលប៉ះពាល់ផ្នែកសន្តិសុខពី AI នៅតែកំពុងត្រូវបានផ្តោតយកចិត្តទុកដាក់។ អាជ្ញាធរនៅចក្រភពអង់គ្លេស សហរដ្ឋអាមេរិក និងកាណាដា បាននិយាយថា ពួកគេបានឃើញពួកលួចចូលទិន្នន័យព័តមានវិទ្យា រួមបញ្ចូលបច្ចេកវិទ្យានេះ៕