បើយោងតាមប្រព័ន្ធកម្មវិធីផ្ញើសារ Telegram ជាច្រើន បានឲ្យដឹងថា យន្តហោះដឹកជញ្ជូនយោធា Il-76 បានធ្លាក់នៅក្នុងតំបន់ Belgorod របស់ប្រទេសរុស្ស៊ី នៅជិតព្រំដែនអ៊ុយក្រែន នាថ្ងៃពុធ (ទី២៤ ខែមករា) នេះ ដោយឧបទ្ទវហេតុនេះត្រូវបានគេរាយការណ៍ថា បានកើតឡើងនៅក្នុងស្រុក Korochansky របស់តំបន់នេះ ហើយយោងតាមប្រព័ន្ធផ្សព្វផ្សាយប៉ុស្តិ៍ 112 បានឲ្យដឹងថា មានមនុស្សចំនួន ៦៣នាក់ នៅលើយន្តហោះ។

ទីភ្នាក់ងារសារព័ត៌មានរដ្ឋរុស្ស៊ី RIA Novosti បានរាយការណ៍ថា យន្តហោះកំពុងដឹកជញ្ជូនទាហានអ៊ុយក្រែនដែលត្រូវបានចាប់ខ្លួន ៦៥នាក់ទៅកាន់តំបន់ Belgorod សម្រាប់ការដោះដូរអ្នកទោស ព្រមទាំងសមាជិកអាកាសយានិក ៦នាក់ និងអ្នកអមដំណើរ ៣នាក់ផងដែរ។

អភិបាលក្រុង Belgorod លោក Vyacheslav Gladkov បានទទួលស្គាល់ «ហេតុការណ៍ នៅស្រុក Korochansky» នេះ តាមរយៈការបង្ហោះ នៅលើកម្មវិធីផ្ញើសារ Telegram ដោយសរសេរថា៖ «ក្រុមស៊ើបអង្កេត និងអ្នកឆ្លើយតបដំបូងកំពុងធ្វើការនៅកន្លែងកើតហេតុ នាពេលនេះ។ ខ្ញុំបានរៀបចំកាលវិភាគការងាររបស់ខ្ញុំឡើងវិញ ហើយធ្វើដំណើរទៅតំបន់នោះ។ ព័ត៌មានលម្អិតទាំងអស់នឹងមានពេលខាងមុខ»។

មួយម៉ោង នៅមុនការធ្លាក់យន្តហោះត្រូវបានរាយការណ៍ដំបូង អាជ្ញាធររបស់តំបន់ Belgorod បានចេញការព្រមានអ្នកស្រុកអំពីការបាញ់មីស៊ីលដែលអាចកើតមាន។ ប្រហែល ៣០នាទីក្រោយមក (ម៉ោង ១១:៤៣ នាទីព្រឹកម៉ោងនៅទីក្រុងម៉ូស្គូ) អភិបាលបានលុបចោលការព្រមាននោះ៕