អ្នកបើករថភ្លើងអាល្លឺម៉ង់បាននាំគ្នាឈប់ធ្វើការជាម្តងទៀត នៅថ្ងៃពុធ (ទី២៤ ខែមករា) ជាអ្វីដែលត្រូវបានរំពឹងថា នឹងក្លាយជាកូដកម្មផ្លូវដែកដ៏យូរបំផុតមិនធ្លាប់មានរបស់អាល្លឺម៉ង់ ដោយធ្វើឲ្យអ្នកធ្វើដំណើរឈឺក្បាលកាន់តែខ្លាំងជាមួយនឹងការមានសញ្ញាតិចតួចនៃការវិលត្រឡប់ទៅកាន់តុចរចា ក្នុងពេលខាងមុខដ៏ខ្លីនេះ។

កូដកម្មដែលបានចាប់ផ្តើមនៅម៉ោង ២ព្រឹកថ្ងៃពុធ ហើយត្រូវបានកំណត់បន្តរហូតដល់ល្ងាចថ្ងៃចន្ទ គឺជាជុំទី៤ នៃសកម្មភាពឧស្សាហកម្ម នៅក្នុងជម្លោះរបស់សហជីព GDL ជាមួយក្រុមហ៊ុនអយស្ម័យយាន Deutsche Bahn ដែលគ្រប់គ្រងដោយរដ្ឋ ហើយកើតឡើងត្រឹមតែ ២សប្តាហ៍បន្ទាប់ពីកូដកម្មលើកមុនបានផ្អាកចរាចរណ៍ផ្លូវដែកជាតិជិតពាក់កណ្ដាលរយៈពេល ៣ថ្ងៃ។ អ្នកនាំពាក្យរបស់ប្រតិបត្តិករផ្លូវដែកជាតិបាននិយាយអំពី «ការរឹតបន្តឹងដ៏ធំ» ជាថ្មី នៅទូទាំងប្រទេស។

អ្នកបើកបរក្នុងការដឹកជញ្ជូនតាមផ្លូវដែក កំពុងធ្វើកូដកម្មក្នុងពេលដំណាលគ្នាដែរ។ អ្នកដឹកនាំសហជីព GDL លោក Claus Weselsky បានប្រាប់ប្រព័ន្ធផ្សព្វផ្សាយ ARD ថា លោកបានត្រៀមខ្លួនរួចជាស្រេច ក្នុងការសម្របសម្រួលនៅក្នុងជម្លោះលើប្រាក់ឈ្នួល និងម៉ោងធ្វើការនេះ ប៉ុន្តែបាននិយាយថា ការផ្តល់ជូនរបស់ក្រុមហ៊ុន Deutsche Bahn មិនទាន់បំពេញតាមការទាមទារគ្រប់គ្រាន់នោះទេ៕