ភ្នំពេញ ៖ វរសេនីយ៍ត្រី ប្រាក់ សេងហុង និស្សិតយោធា និងជាស្រ្តីដំបូងគេនៅប្រទេសកម្ពុជា បានការពារសារណា ជាប់ដោយជោគជ័យ និង ទទួលបាននិទ្ទេសល្អ ថ្នាក់អនុបណ្ឌិត វិទ្យាសាស្រ្តយោធា នៅសាលាបញ្ជាការសេនាធិការកងទ័ពជើងគោក សាធារណរដ្ឋប្រជាមានិតចិន នៅថ្ងៃទី២៤ខែមករា ឆ្នាំ២០២៤។ នេះបើតាមសំណេរនៅក្នុងទំព័រហ្វេសប៊ុករបស់Army life។

មុនចេញទៅរៀនបន្តយកថ្នាក់អនុបណ្ឌិតវិទ្យាសាស្រ្តយោធានៅប្រទេសចិន កញ្ញា ប្រាក់ សេងហុង បានចូលបម្រើការជាជំនួយការ ឯកឧត្តមនាយឧត្តមសេនីយ៍ នាង ផាត ពីឆ្នាំ២០១៩ ដល់ឆ្នាំ២០២៣ ហើយថ្ងៃទី២៤ខែមករានេះ កញ្ញា សេងហុក បាននាំភាពជោគជ័យយ៉ាងត្រចេះត្រចង់ជូនជាតិមាតុភូមិ គឺជាស្រ្តីទី១ដំបូងគេដែលបានបញ្ចប់ថ្នាក់អនុបណ្ឌិតវិទ្យាសាស្រ្តយោធានៅប្រទេសមហាអំណាចិន៕

យោងតាមប័ណ្ណជីវប្រវត្តិសង្ខេប កញ្ញា ប្រាក់ សេងហុង កើតថ្ងៃទី១០ ខែកញ្ញា ឆ្នាំ១៩៩៦ នៅភូមិពេជ្រចង្វា ឃុំបឹងក្រាញ់ខាងកើត ស្រុកសំរោង ខេត្តតាកែវ។ កញ្ញាមានបងប្អូនបង្កើតចំនួន ៧នាក់ក្នុងនោះកញ្ញាជាកូនទី៤ ក្នុងគ្រួសារ ដែលជាកូនកសិករ និងឪពុកជាអតីតនាយទាហាន។

កញ្ញា ប្រាក់ សេងហុង បានប្រលងជាប់នៅសាលានាយទាហានសកម្មជំនាន់ទី១៩ ឆ្នាំ ២០១៥ ដែលធ្វើការហ្វឹកហាត់រយៈពេល ៤ឆ្នាំ។ កញ្ញាទទួលបានការហ្វឹកហាត់វគ្គឆត្រ័យោង នៅឆ្នាំ២០១៨ និងបរិញ្ញាបត្រយោធា ឆ្នាំ២០១៩ ព្រមទាំងធ្លាប់បានចេញទៅហ្វឹកហាត់រយៈពេល ១១ខែក្នុងវគ្គបញ្ជាការសេនាធិការកងទ័ពជើងគោកនៃមហាវិទ្យាល័យកងទ័ពជើងគោកប្រទេសចិន។ បច្ចុប្បន្នកញ្ញា ប្រាក់ សេងហុង មានឋានន្តរស័ក្តិ «វរសេនីយ៍ត្រី» នៃកងយោធពលខេមរភូមិន្ទនៃក្រសួងការពារជាតិ ៕ ដោយ ៖ ទូច សោភ័ណ