រដ្ឋមន្ត្រីការបរទេសរបស់ប្រទេសម៉ុលដាវីលោក Nicu Popescu បានចុះចេញពីតំណែង នៅក្នុងការសម្រេចដ៏គួរឲ្យភ្ញាក់ផ្អើលមួយ នៅថ្ងៃពុធ (ទី២៤ ខែមករា) បន្ទាប់ពីបានជួយនាំឲ្យសាធារណរដ្ឋរបស់អតីតសហភាពសូវៀតឆ្ពោះទៅរកសមាជិកភាពសហភាពអឺរ៉ុប (EU)។

កាលពីខែមុន បណ្ដាមេដឹកនាំ EU បានយល់ព្រមបើកការចរចាសមាជិកភាពជាផ្លូវការជាមួយនឹងប្រទេសដ៏តូចដែលមានព្រំដែនជាប់អ៊ុយក្រែនមួយនេះ។ លោក Popescu ដែលធ្លាប់ជាឧបនាយករដ្ឋមន្ត្រីផងដែរនោះ បានប្រាប់សន្និសីទសារព័ត៌មាននៅរដ្ឋធានី Chisinau ថា៖ «វាគឺការមានអារម្មណ៍ច្របូលច្របល់ដែលខ្ញុំត្រូវប្រកាសថា ខ្ញុំបានសម្រេចចិត្តលាលែងពីតំណែងរបស់ខ្ញុំ»។

បុរសវ័យ ៤២ឆ្នាំរូបនេះ បាននិយាយថា រូបលោក «ត្រូវការការសម្រាក» ប៉ុន្តែបានប្តេជ្ញាថា នឹងឈរជាមួយប្រធានាធិបតីដែលជាសម្ព័ន្ធមិត្តរបស់លោក គឺលោកស្រី Maia Sandu ដែលកំពុងស្វែងរកអាណត្តិទី២ នៅឆ្នាំនេះ។ លោក Popescu គឺជាម្នាក់ក្នុងចំណោមអ្នកនយោបាយដែលគាំទ្រសហភាពអឺរ៉ុបបំផុតរបស់ប្រទេសម៉ុលដាវី។ រូបលោកនឹងត្រូវជំនួសដោយលោក Mihai Popsoi របស់គណបក្ស PAS ដែលគាំទ្រអឺរ៉ុបដូចគ្នា។

ប្រទេសដែលមានប្រជាជនចំនួន ២,៦លាននាក់ ដែលមានព្រំប្រទល់ជាប់ប្រទេសអ៊ុយក្រែន និងប្រទេសសមាជិកសហភាពអឺរ៉ុបរូម៉ានី បានទទួលឋានៈជាបេក្ខជនសហភាពអឺរ៉ុប ក្នុងខែមិថុនា ឆ្នាំ២០២២៕