មន្ត្រីនគរបាលដែលមិនបានបំពេញកាតព្វកិច្ចរាប់ពាន់នាក់ ក្នុងសម្លៀកបំពាក់ធម្មតា បានចេញតវ៉ានៅទីក្រុង Lisbon ដើម្បីទទួលបានប្រាក់ខែកាន់តែប្រសើរ ដោយទាមទារឱ្យមានការតម្លើងប្រាក់ឈ្នួលដូចគ្នានូវប្រាក់សម្រាប់ពេលគ្រោះថ្នាក់ ដែលរដ្ឋាភិបាលចាកចេញពីតំណែង កាលពីពេលថ្មីៗនេះបានផ្តល់ដល់នគរបាលស៊ើបអង្កេតឧក្រិដ្ឋកម្ម (PJ) ។ កាលពីចុងខែវិច្ឆិកា បន្ទាប់ពីការលាលែងពីតំណែងរបស់នាយករដ្ឋមន្ត្រី លោក Antonio Costa ប៉ុន្តែ ខណៈលោក នៅតែមានអំណាចពេញលេញក្នុងការសម្រេចចិត្តរយៈពេលវែង រដ្ឋាភិបាល បានអនុម័តការដំឡើងប្រាក់គ្រោះថ្នាក់សម្រាប់នគរបាលស៊ើបអង្កេតឧក្រិដ្ឋកម្ម ដែលអាចឈានដល់ជិត ៧០០ អឺរ៉ូ ឬ៧៦៣ ដុល្លារ ក្នុងមួយខែ ។ ចាប់តាំងពីពេលនោះមក មន្ត្រីនគរបាលសន្តិសុខសាធារណៈ (PSP) និងសមាជិកនៃឆ្មាំសាធារណៈ (GNR) ដែលដើរល្បាតតាមដងផ្លូវ និងតំបន់ជនបទ បានមកប្រមូលផ្តុំគ្នានៅក្នុងទីក្រុងជាច្រើន ដើម្បីតវ៉ាចំពោះអ្វីដែលពួកគេបានចាត់ទុកថា ជាទង្វើរើសអើង។ ក្រុមបាតុករ បានប្រមូលផ្តុំគ្នានៅទីលានមួយក្នុងទីក្រុង Lisbon ហើយបានចាប់ផ្តើមការហែក្បួនស្ងាត់ៗឆ្ពោះទៅកាន់សភា ជាកន្លែងដែលពួកគេមានផែនការច្រៀងបទចម្រៀងជាតិ។ រដ្ឋមន្ត្រីក្រសួងមហាផ្ទៃ លោក Jose Luis Carneiro បាននិយាយថា រដ្ឋាភិបាលចាំផ្ទះ លែងសម្រេចបាន លើការដំឡើងប្រាក់ឈ្នួលទៀតហើយ ហើយវានឹងអាស្រ័យលើរដ្ឋបាលបន្ទាប់ ដែលកើតចេញពីការបោះឆ្នោតថ្ងៃទី ១០ ខែមីនា ដើម្បី បន្តការទទួលខុសត្រូវបន្ទុកថវិកាថ្មី។

សមាគមសហជីពនគរបាល ASPP បាននិយាយថា ប្រាក់សម្រាប់គ្រោះថ្នាក់ជាមធ្យមនៅក្នុងមន្ត្រីនគរបាលសន្តិសុខសាធារណៈ(PSP) បច្ចុប្បន្នមានចន្លោះពី ៣៨០ ទៅ ៤២០ អឺរ៉ូ ក្នុងមួយខែ ខណៈនគរបាលស៊ើបអង្កេតឧក្រិដ្ឋកម្ម(PJ) បានឈានដល់ ១.០០០អឺរ៉ូ។